HEWLÊR 

Heyetek ji rojavayê Kurdistanê ku ji Endamê Desteya Bilind Aldar Xelîl, Hevseroka Meclisa Rojavayê Kurdistanê Sînem Mehemed û Hevseroka Partiya Yekîtiya Demokratîk (PYD) Asya Ebdullah pêk tê, bi Serokê Herêma Başûrê Kurdistanê Mesûd Barzanî re hevdîtin pêk anî.

Li gorî nûçeya malpera fermî ya Serokatiya Herêma Başûrê Kurdistanê hevdîtin îro li navçeya Selahedîn a girêdayî Hewlêrê pêk hat. Li gorî nûçeyê di hevdîtinê de li ser bûyer û geşedanên li rojavayê Kurdistanê û Suriyê hate rawestin. Di nûçeyê de tê gotin ku heyeta rojava di hevdîtinê de derbarê pêwendiyên di navbera partiyên kurdan ên li Suriyê û pirsgirêkên wan de agahî dane Barzanî.

Di nûçeyê de tê gotin ku Barzanî jî pêvajoya ku niha li Suriyê tê jiyandin ji bo mîsogerkirina destkeftiyên kurdan wekî derfetekê nirxandiye û diyar kiriye ku li gel cudahiya bîr û baweriyê ya di navbera partiyên siyasî de jî, pêwîst e hemû alî li ser xalên hevbeş û stratejiyekê tevbigerin. Her wiha Barzanî got ku ji bo destkeftiyên Rojava ji dest neçin, pêwîst e hemû alî hebûna hev qebûl bikin û eger baweriya wan bi prensîbên sereke hebin, dikarin li ser naveroka wan jî bigihîjin peymanekê.