Diyarname
Pirtûka lêkolîner Rohat Alakom a  bi navê “Di Folklora Kurdî de Serdestiyeke Jinan” ji aliyê  Weşanên Avestayê ve hat weşandin.

Rohat Alakom heta niha gelek pirtûkên xwe yên lêkolînî dan çapkirin. Niha pirtûkek din a lêkolînî li van zêde kir lê ev hinek din xweser e. Ev lêkolîn, tenê li ser beşeke folklora kurdî hatiye pêkanîn. Xebateke sînorkirî ye, tenê di nav folklora kurdî de cîhê jinan û motîfên ser temaya jinan pêşkêş dike. Vê lêkolînê hemû nimûneyên folklora kurdî, ji xwe re nekiriye materyal, nedaye ber çavan. Nimûne tenê ji nav çîrok, destan, gotinên pêşiyan û stranan, ji nav van çar beşên bingehîn hatiye hilbijartin.

Girîngiya vê xebata piçûk ew e ku li ser folklora kurdî lêkolîneke bi zimanê kurdî tê çêkirin. Ji aliyê din, xebat bi xwe jî li ser babet û tema jinan e, bi vî awayî mirov dikare bêje du rûçikên vê pirtûkê hene: folklor û jin. Ev her du babet di vê pirtûkê de ketine zikê hev, hev dewlemend kirine. Xwendevan ji alîkî de dikare folklora kurdî binase, nimûneyên vê folklorê tam bike, ji aliyê din bi saya hin berhemên folklorîk dikare derbarê cîhê jinan û rewşa jinan de zêdetir agahdar bibe û zanyariyên xwe pêş de bibe. Ji aliyê din dema ev pirtûk hate berçavkirin, xwendevan ê bibîne ku, jinan di folklora kurdî de ji xwe re textek ava kirine û serdestiyeke wan heye. Di folklora kurdî de gotin “gotina jina” ye û kilam “kilamên keçikan” in.

Di Folklora Kurdî de Serdestiyeke Jinan / Rohat Alakom / Weşanên Avesta / 168 rûpel