Diyarname
Nivîskar Fatma Savci çû li rojavayê Kurdistanê geriya, li wê derê bi berpirs, gel û rayedarên wê derê re axivî û di encamê de pirtûkek amade kir. Pirtûk ji Weşanên Avestayê derket.

Pirtûka ku bi navê "Ber bi Binxetê ve / Rojnivîska Rojava" hatiye weşandin, ji rojnivîska Fatma Savci pêk tê û agahiyên dawî yên li rojavayê Kurdistanê tê pêşkêşkirin. Pirtûk ji 212 rûpelan pêk tê û têde dîmenên dawî yên aîdê rojavayê Kurdistanê jî cih digirin. Her wiha Weşanên Avestayê ji bo her kes bixwîne buhaya pirtûk bi buhayeke erzan, bi 5 TL'yî radigihîne ber destê xwendevanan.

Bi taybetî kurdên bakur û yên rojava tu demê sînorê ku li nav wan hatiye sazkirin qebûl nekirine. Jixwe tu demê qala 'sînor' jî nekirine û gotine binxet-serxet. Îro li binxetê qewimînên girîng çêdibin. Di nav çapemeniya kurdan de, di nav partiyên siyasî yên kurdan de her kes tiştek dibêje. Kesên ku bibêjin em herin wir, bi çavên xwe bibînin, bi guhên xwe bibihîzin û fêm bikin ka çi diqewime yan tune ne, yan jî gelek hindik in. Yek ji wan kesan ku gotiye ez herim bigerim, bibînim û binivîsim jî nivîskar Fatma Savci ye. Savci ji bo rojavayê Kurdistanê gereke organîze kir û ev gera xwe roj bi roj not girt, ji wan notan, rojnivîskan pirtûkek derxist. Pirtûk ji du aliyan ve girîng e; aliyek kurd zêde rojnivîskan nanivîsin, aliyê din jî ji dêvla ku ji dûr ve qal bike, çûye navê û ji wir qal dike.

Nivîskar Savci qala rola kurdên rojava ya di têkoşîna bakur û başûr de dike û wisa dibêje: "Bi kinayî, ked û rola Kurdistana Rojava di dîroka kurdan de bêhempa ye. Niha derfet çêbûye ku xewna xwe ya azadiyê pêk bîne û di nav malbata mirovahiyê de bi rûmet xwe cih bistîne. Niha çavên rojavayê Kurdistanê li hemî cîhana mirovperwer  û azadîxwaz e ku piştgirî bide têkoşîna wan a azadiyê. Daxwaza wan ji hemû kurdên beşên din ew e ku hêza xwe bi ya wan re bike yek."

Bingeha vê pirtûkê heta sala 2007'an diçe. Savci, di sala 2007'an de diçe rojavayê Kurdistanê dixwaze li ser Serhildana 2004'an dosyayeke amade bike, hevpeyvînan dike lê di vegerê de, li mala wan berî ku kasetan deşîfre bike, kasetên wî xira dibin. Savci wisa didomîne: "Ev wekî deynekî bû di stûyê min de. Lê êdî çax hat ku ez careke din herim Rojavayê welatê xwe û van rojên dîrokî bibînim û bijîm. Demeke hindik be jî bibim şahidê van rojên wan ên dîrokî. Û ne tenê ez bibînim, bi qasî ku min dît û binivîsim jî. Hêvî dikim ku ev nivîsên min hêjayî hêvî û xewna azadiya Rojavaya delalî ya welatê min be."

Fatma Savci dibîne, nîşan dide, balê dikşîne ser meseleyên bingehîn û îqaz dike. Ji bo kesên bixwazin li ser rojavayê Kurdistanê hin agahiyên nû bixwînin, hîn bibin "Ber bi Binxetê ve / Rojnivîska Rojava" çavkaniyeke nû û girîng e.

FATMA SAVCI KÎ YE?

Nivîskar Fatma Savci di sala 1974'an de, li gundê Girêmîra ku li ser Nisêbînê ve ye ji dayik dibe. Dibistana seretayî li Girêmîra dixwîne. Di sala 1992'yan de, ji ber raman û çalakiyên xwe yên siyasî tê girtin. Di dawiya sala 2003'yan de, ji zindanê derdikeve. Savci li girtîgehê dest bi nivîsan dike û helbestên wê di kovar û rojnameyên kurdî de belav dibin. Piştî derdikeve heta niha pirtûkên wê yên helbestan bi navê "Gulên Qasid", "Xewnên Zîvîn", "Bîra Birînê" û peşxana wê bi navê "Şewq û Payîz" ji Weşanên Avesta derkevin. Pirtûka wê ya dawî "Ristika Morîkan" jî wekî çîrok di sala 2012'yan de derket. Berî ku sal temam bibe pirtûka wê "Ber bi Binxetê ve / Rojnivîska Rojava" digihîje ber destê xwendevanan.
Fatma Savci niha li Swêdê dijî, mamostetiya zimanê kurdî dike û pêre jî xebatên xwe yên wêjeyî didomîne.

Ber bi Binxetê ve - Rojnivîska Rojava / Fatma Savci / 212 rûpel