Amed
Li gundê Arzoxlî yê Sûra Amedê dixwazin GES'ê (Santrala Enerjiya ji Rojê) saz bikin. Gundî naxwazin li gundê wan tiştek wisa çêbibe. Hefteyek e di vî warî de çalakiyên gundiyan û xirecir didome.
Îro bûyereke balkêş qewimî. Helîkoptereke leşkerî daket qada gund û leşkerên ji helîkopterê peya bûn, raste rast gef li gundiyan xwar. Piştî demeke kurt a rageşiyê, helîkopter ji herêmê bi dûr ket, lê fikarên gundiyan ên li ser ewlehiya wan berdewam dikin.

Hefteyek berê êrîşek tund pêk hatibû
Ev ne cara yekem e ku gundî rastî zextan tên. Hefteyek berê, gundiyên ku dixwestin daxuyaniyeke çapemeniyê bidin, bi mudaxeleya tund a cendirmeyan re rû bi rû mabûn. Di wê êrîşê de bombeyên gazê û guleyên plastîkî hatin bikaranîn. Gelek gundî birîndar bûn.

‘Em naxwazin axa me bibe qada şirketan’
Şêniyên gundê Arzoxlî yê li dijî projeya GES'ê bi biryar in. Gundî diyar dikin ku ev proje li ser zeviyên wan ên çandiniyê û qadên jiyanê tê avakirin û ev yek dê debara wan û xwezaya gund tune bike. Gundiyan daxwaz kir ku şîrket û dewlet destê xwe ji ser axa wan bikişînin.

Tevî hemû zext û gefan jî, xelkê Arzoxliyê destnîşan dikin ku ew ê ji bo parastina axa xwe têkoşîna xwe berdewam bikin.
AW