Kurd îsal di Fûara Stenbolê de çi dikin?

___Cemil Oguz___
Carek din li Stenbolê Fûara Pirtûkan li dar dikeve. Fûar 9 rojan li dar e. Îsal di fûarê de şopeke biçûk a kurdan heye.
Fûara Pirtûkan a Stenbolê îsal 41'emîn car li dar dikeve. Fûar wê 2'yê sermawezê deriyên xwe veke û heta 10'ê mehê dê vekirî be.
Di fuara îsal de wekî "Mêvanê Rûmetê" navê nivîskar Yalvaç Vural eşkere kirine. Ji ber ku Vuralî ji bo zarokan gelek pirtûk nivîsîne, fûarê mijara bingehîn jî wekî "Zarokatî Şahî ye" eşkere kir û di vê çarçoveyê de ji bo zarokan dê gelek çalakî hebin.
Li aliyê din wekî 'Welatê Mevan' jî îsal Azerbeycan diyar kiriye. Di vê çarçoveyê de li ser wêjeya Azerbaycanê dê çalakî lidar bikevin, gelek nivîskarên azerî ji wê li fûarê bin.
Li gor daxuyaniya amadekarên fûarê îsal di fûarê de 450 çalakiyên çandî hene. Her wiha 2000'î zêdetir rojên îmzeyan dê li dar bikevin.
WEŞANXANEYÊN KURDAN Û ÇALAKÎ
Li gor lîsteya li ber destê me li Bakur û li Tirkiyeyê nêzî 30 weşanxaneyên kurdan karê çapkirin û belavkirina pirtûkan dikin. Ji van tenê Nûbihar îsal beşdarî Fûara Pirtûkan a Stenbolê dibe. Nûbihar li Salona 8'an standa 816'an de li cihê xwe yê her demî dê li benda xwendevanên xwe be. Di 9 rojan de li dor deh nivîskarên Nûbiharê dê li fûarê bin û pirtûkên xwe îmze bikin.
Ji bilî Nûbiharê ji kurdan wekî weqif jî Weqfa Îsmaîl Beşîkçî standê vedike. Weqif li nav weqfan, li cihê xwe yê her salê (Salon 6, no 631) ye. Di serî de Îsmaîl Beşîkçî, Îbrahim Gurbuz û Nîhat Gultekîn, nivîskarên weqfê jî li standa wan dê pirtûkên xwe îmze bikin.
GOTÛBÊJA LI SER NETEWEPERWERIYA KURDAN
Ji dor 450 çalakiyên çandî tenê du çalakiyên kurdan di fûarê de hene, wan herduyan jî Weqfa Îsmaîl Beşîkçî li dar dixe. Gotûbêja pêşî bi navê "Jiyaneke hatiye bexşandin" 8'ê mehê saet 15'an de li dar dikeve. İbrahim Gurbuz wê wekî axifger cih bigire.
Gotûbêja din bi navê "Kurd divê çima neteweperest bin?" li dar dikeve. Îbrahîm Gurbuz, Celal Temel û Îsmaîl Beşîkçî wekî axifger beşdar dibin. Gotûbêj roja 10'ê mehê saet 11.00'an de li dar dikeve.

Dor 10 nivîskarên Nûbiharê li fûarê wê pirtûkên xwe îmze bikin.

Nûçeya Eleqedar:

- Mijara Fûara Pirtûkan a Stenbolê 'Zarokatî Şahî ye!'

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.

***