___Sîma Birokê / Qamişlo___

Hejmara xwendekarên ji bo serdema 2024-2025'an li Zanîngehên Rojava, bi gotina fermî Zanîngehê Bakur û Rojhilatê Sûriyeyê bi cih bûn, eşkere bû. Li 3 zanîngehên vê herê û peymangehên girêdayî desteyên Rêveberiya Xweser bi temamî 2 hezar û 193 xwendekar hatin qebûlkirin.

Pêvajoya qebûlkirina xwendekaran ya ji bo sala nû (2024-2025) a zanîngehên li Bakur û Rojhilatê Sûriyeyê di meha gelawêjê de dest pê kiribû û destpêka kewçêrê de bi dawî bû. Xwendekarên ku dê nû zanîngehê bixwîn, di beşên zanistî û pîşeyî de tevlî ezmûnan bûn û li gorî encamên ezmûnan li fakulte û peyamangehan hatin bicihkirin. 

HEJMARA XWENDEKARAN

Li gorî agahiyên ku Hevserokê Hemahengiya Zanîngehên Bakur û Rojhilatê Sûriyeyê Xelîl Elî dane ANHA`yê hejmara xwendekarên ku hatine qebûlkirin, li Zanîngeha Rojava 827, Zanîngeha Kobanê 435 û Zanîngeha El-Şerq 326 xwendekar in.

Li kêlek fakulte û peymangehên girêdayî zanîngehan, li herêmê peymangehên girêdayî desteyên perwerde, çandê û tenduristiyê yên Rêveberiya Xweser jî hene.

Li Peymangehên Amadekariya Mamosteyan ên Qamişlo, Hesekê û Şehbayê yên girêdayî Desteya Perwerde û Fêrkirinê 494 xwendekar hatine qebûlkirin.

Li Peymangehên Tenduristiyê yên Şehba û Hesekê 45 xwendekar hatine qebûlkirin.

Li Peymangeha Bilind a Hunerî jî 66 xwendekar hatine qebûlkirin.

FAKULTE Û PEYMANGEHÊN NÛ

Îsal sal ji aliyê Tevgera Çand û Hunera Demokratîk a Mezopotamyayê (TEV-ÇAND) û bi pêşengtiya Desteya Çandê ya Kantona Cizîrê ve Peymangeha Bilind a Hunerî li Rojava hate vekirin ku navenda wê li bajarê Dêrikê ye.

Li Zanîngeha Kobanî Peymangeha Îdarî û Qanûnê bû Fakulteya Mafnasî, Peymangeha Bilind a Ragihandinê hate vekirin. Beşa Bexçeyê Zarokan jî li Fakulteya Perwerdeyê hatiye zêdekirin.

Li Zanîngeha El-Şerq jî Peymangeha Zimanê Kurdî (Tebqa-Reqa), Peymangeha Endezyariya Ceyranê û Mîkanîk (Tebqa) hate vekirin.

LI ZANINGEHAN 4 HEZAR 775 XWENDEKAR

Di sala xwendinê ya 2024-2025 nêzî 2 hezar û 721 xwendekar li Zanîngeha Rojava, hezar û 459 xwendekar li Zanîngeha Kobanê û 595 xwendekar li Zanîngeha El-Şerq dixwînin. Li zanîngehan 6`ê kewçêrê dewma xwendekaran dest pê kir. (ANHA)

Hevserokê Hemahengiya Zanîngehên Bakur û Rojhilatê Sûriyeyê Xelîl Elî der barê hejmara xwendekaran de agahî dan.