Stenbol
Kurdekî ji Duhokê bi navê Hekîm Loqman li Stenbolê, li Aksarayê di encama êrîşkirina bi kêran de hat kuştin.
Li gor agahiyên hatine belavkirin ji ber ku Hekîm Lokman bi kurdî axiviye rastî êrîşa 10-12 kesan hatiye û bi kêrê hatiye kuştin.
Li gor nûçeya Rûdawê Hekîm Loqman ji gundê Kelekçî ya Şêxana Duhokê bû. Li Aksaraya Stenbolê ji ber sedema nediyar rastî êrîşê 10-12 kesan hatiye û hatiye kuştin. Yek ji xizmên Hekîm Loqman Ekrem Nesrullah ji bo Rûdawê di weşana yekser de gotiye, "Ji bo sê rojan li otelê cih ediqetîne. Saet dor 01.30 ji bo tiştinan bixwe diçe kafeyê. Ligel kurapê xwe yê li Îngilistan bi kurdî diaxive. Wê kêliyê komek ji 10-12 kesî êrîş dike. Bi kêrê lê didin. Nagihîje nexweşxaneyê, dimire. Ji ber bi kurdî diaxive çêrê wî dikin, Hekîm jî bi tirkî dizane, bersivê dide, paşê kêrê lê didin û dikujin."
Heta niha ji aliyê êrîşkar kes nehatiye binçavkirin. 

BAKIRHANÎ BÛYER ŞERMEZAR KIR
Hevserokê DEM Partî Tuncer Bakirhan bi ser hesabê xwe re peyamek belav kir û bûyer şermezar kir.
Bakirhan wisa got, "Hemwelatiyê Herêma Kurdistana Federe Hekîm Loqman li Stenbolê li kafeyeke ji ber ku bi kurdî axiviye ji aliyê 12 kesan ve bi hovîtî hat kuştin. Ev êrîşî êrîşeke dijî hebûna kurdan e. Desthilatdariya AKP-MHP'ê rewşa siyasî û civakî bi jehrî kiriye û ev encama vê yekê ye. Di rojên dawî de êrîşên li hemberî karkerên kurdan, zimanê kurdî, çanda kurdî û stranên kurdî êrîşê organîze ne û sebeba vê yekê jî desthilatdarî ye. Mikruhên bi maskeyên JÎTEM'ê wekî ku herin şer diçûn temaşevan fûtbolê vê wêrekiyê ji hikumetê digirin. Ev rewşa nefretê îro bû sedema kuştina kurdekî din."
Bakirhan got ku ew hikumetê hişyar dikin ku dest ji gotinên nijadperest û şovenîst berde.