___Cemil Oguz___
Don Kîxotî êrîşek bi ser aşek de bir, lê Spanyayê tam 20 êrîş bi ser Îtalyanan de birin.
Don Kîxot li hemberî qralan, rêbiran, keriyê mihan ku wekî artêşên neyar bi nav dikir şer kiribû; Spanyayê li hemberî keleha Îtalyayê, defansê, lîstikvanên nav sehayê, bi kurt û kurmancî li hemberî hemû Îtalyayê şer kir û ew dehf dan kunên mişkan.
Îtalyanên ku wekî spanyolan bi 3 pûanan hatibûn maça duyemîn, digotin qey wê wekî Dante helbestan birêsin û helbestan bixwînin, lê spanyolan bi peyvên Cervantesî êrîşê helbestên wan dikir û band li devê Dante dan. Dante, di 45 deqîqeyan de tenê karî carek helbestek bixwîne, ew jî di deqîqeya 45'î de bû; lê Spanyayê tam bi temamî 20 gotin wekî tîran, yanê 20 şût, her şûtek bi ser helbestek Dante de weşandin.
Di dawiya 90 deqîqeyan de 20 şûtên Spanyayê hebûn, ên Îtalyanan tenê 4; yê spanyolan 9 jê bi îsabet bûn, yên îtalyanan tenê yek. Ji vê îstatîskê zêdetir mirov dikare tiştek çawa beje?
Di Euro 2024 de heta vê maçê 17 maç hatibûn lîstin û ev a 18'an bû, lê tu maçek ew qas bi êrîşan bi dawî nebûbû. 17 maçên çûyî yek jî bi qasî vê bi heyecan, bi qasî vê bi lez, bi şût, bi pozisyon nebûbû. Me dixwest bibêjin, "bi qasî vê bi pir golan bi dawî nebûbû" lê qeleparêzê îtalî Donnaruma nehişt em hevokek wisa saz bikin.
Spanyol gelek bi lez bûn, lez û bez bûn; difiriyan; Nico Williamsê serê lîstikvanan gêj dikir, Lamine Yamal ew her yek bi aliyek de dipekand, Rodri li hemberî wan dibû dîwar û nedihişt ew bi pêş de werin… Dema gog winda dikirin jî bi lez bûn, bi vê lezê di nav çend saniyeyan de gog dîsa bi wan re û hakim ew bûn.
Ahenga di navbera 5 lîstikvanên li pêş ên Spanyayê de, ji aliyê paş ve jî Rodrigo her dihat, Carvajal dihat alîkariyê û ji bo îtalyanan tenê ev dima: Xwe biparêze, mimkûn be golê nexwe. Bi taybetî di 45 deqîqeyên pêşîn de lîstikvanên spanyolî di nav ahengek gelek serketî de bûn, bi vî awayî jî îtalyan ew qas bela wela bûn.
Bi gotina herî ji rêzê em dikarin wisa bînin ziman: Spanyolan îtalyan di bin lingên xwe de pelixandin. Ger neguher û bi paş ve neçe; ev lîstik, ev daxwaz, ev pergala lîstinê wê Spanyayê bibe fînalê. Ha, ber bi dawiya maçê ve westiyan, loma jî di fînalê de ev şéwaz lîstinê divê belavî 90 deqîqeyî bikin.
Û Îtalya; Îtalya wisa bilîze karê wê zehmet e. Bi vê lîstikê wê çawa li hemberî Hirvatistana berxwedêr bilîze? Ku di maça 3'yemîn de Hirvatistan jî helbet wê bixwaze bi ser bikeve û here Dora 16'an. Îtalyanên ku di vê maçê de hicum ji bîr kiribûn, li hemberî Hirvatistanê wê çi bikin, meseleya meraqê ye.
Axir û bi kurt û kurmancî, Spanyayê di deqîqeya 2'yan de li ber keleha Îtalyayê bi Pedri nêzî golê bû, deqe 10'an de Williams şûtek xweş kişand, deqe 25 vê carê Fabian Ruizî ji dûr bi şid lê da û Donnarummayê serketiyê rojê bi ser tiliyên xwe gog avêt derve. Di 45 deqeyên pêşî de li aliyek 11 lîstikvanên Spanyayê hebûn, li aliyê din qeleparêz Donnaruma tenê hebû.
Di nîveka duyemîn de Îtalya hinek hat serê xwe lê dîsa jî rewş wekî berê bû. Di deqîqeya 52'yan de dîsa Pedri lêda, 58'an de Morata ji derveyê pêş kelehê lêda; Donnaruma bi ser tilêkên xwe gog şand kornerê. Deqekî paşê Le Normand bi serî lêda çênebû. Deqe 70'ê bû vê carê Williamsî bi şuta xwe di kelehê de erhej çêkir, lê gog ji dîrekê çû derve. Û deqe 90, deqe 90+2 Perezê ku deqe 79'an de ketibû nav maçê du caraz mikemel gog bir pêş kelehê, bi qeleparêz re rû bi rû ma, lê Donnaruma destûr neda golê biavêje. 
Di nav ew qas êrîşan de helbet Îtalyanan wê xeta bikira û kir jî. Di deqîqeya 55'an de Williamsî ji aliyê çepê ve gog şand nav ber kelehê, Morata serî lê da, qeleparez Donnarumma ji ser xêzê mudexeleyê gogê kir, gog çû li hevalê wî Calafiori ket û vegeriya nav torê: 1-0.
Bi vê yekê spanyolan 3 pûanên bi qasî şîrê diya xwe helal girtin û derbarî Dora 16'an bûn. Di Dora 16'an de wê mala reqîbê wan xira bibe.