Cemil Oguz
Bifikirin Ga û Matador li arenayê ne. Divê 90 deqe bilîzin, lê têre nake, 132 deqe dilîzin, ew jî têrê nake û dibêjin: Yek ji min yek ji te. Paşê? Paşê wekî her gavê matador zora ga dibe. Sevillaya matador dibe şampiyon, ga ku sembola Romayê ye vedigere mala xwe.
Werin em bi vî awayî lê binêrin:

Li Spanyayê lîstika ga û matador ku bi navê "Guleşa Gayan" jî tê zanîn, lîstikeke navdar e. Matador rengên sor nîşanî ga dide, ga êrîş dike, her êrîş dike heta ku diweste. 

Formaya Romayê sor e, sembola Romayê jî ga ye. Û helbet dema rewş wisa be rol dikeve ser milê matador; bi gotina din rol dikeve ser milê Sevillayê. Û wisa bû jî. Di nîveka yekemîn de gayê Romayê qiloçek li matador, yanê Sevillayê dabû û nîveka yekemîn bi 1-0 derketibû pêş. Di nivîka duyemîn de matadorên Sevillayê tîrek li ga dan, ga westandin, lê di encama 90 deqîqeyî de wekhevî hebû; ne ga miribû, ne matador têk çûbû. Rewş ber bi 30 deqîqeyên zêdek ve diçû, lê ne 120 deqe, tam 132 deqe lîstika ga û matador dom kir. Her duyan jî ber xwe dida. Lê encam tune bû û vê carê dê wisa ba: Matadorî dê tîrek biavêta, gayî dê qiloçek lêda; kî zora kî bir.

Di vê kêliya ku navê wê yê navneteweyî bikaranîna penaltiyan e Sevillayê bi Ocampusê gol avêt. Romayê bi Cristanteyê bersiv da. Dûre matadorên Sevillayê rola xwe anîn cih, tîren xweş daweşandin, lê li aliyê din gayan nekarîn qiloçan li matador bidin. Ji Romayê pêşî Mancini nekarî golê bavêje, dûre Ibanez gog li dîrekê da û hêvî çû, quwet çû, xwîn ji gayan hat û tîra dawî Gonzalo Montiel lêda: Kûpa ê Sevilla ye.

Her çiqas bi mîlyonan temaşevanan li lîstika "Guleşa Gayan" temaşe kir jî çend deqîqe ne têde zewqek mezin nîn bû. Loma jî li ser lîstikê tiştên zêde bêne gotin nîn in. Roma bi berxwedanê heta 132 deqe hat û hew. Lê mesele çi be jî, lîstik hat lîstin, yên têk çûn çûn, yên serketin jî navê xwe li dîrokê kirin û ji bo salek din xatir xwestin.

7 NÛWAZEYÊN DINYAYÊ DIBE MALA XWE

Heta niha Sevilla çiqas derketibû fînalê bi ser ketibû, carek din ev kevneşopî dom kir. Sevillayê di sala 2006, 2007, 2014, 2015, 2016, 2020 û 2023'yan de, tam bû 7 caran vê kûpayê dibe mala xwe. Bi vê yekê di dîroka dinyayê, Kûpaya Lîga Ewropayê de tima herî zêde ev kûpa girtiye ye.

Sevilla çiqas derketibû fînalê her kûpa girtibû. Li aliyê din teknîk dîrektorê Romayê Jose Mourinho hebû ku çiqas derketibû fînalê kûpa girtibu lê yekem car di fînalê de winda kir.

LÎSTIKVANÊ SERKETÎ

Li aliyê din UEFA ku di her maçê de lîstikvanê herî serketî hildibijêre di vê maçê de qeleparêzê Sevillayê Yassine Bounou wekî lîstikvanê herî serketî hilbijart.

***
ÇAWA DEST PÊ KIRIBÛ?
Maç wisa dest pê kiribû: Romayê tîma Fiorentina, Sevillayê jî Juventus têk biribû û derketibû fînalê. Maç li gor saeta Amedê saet 22.00'an de li Stada Stada Puskas Arena ya li Budapeşteya Macaristanê ye dest pê kir. 

Li starê cihê 67 hezar û 215 kesî têde heye. Stad mişt tije bûye. Berî maçê merasim li dar ket û paşê bi firfiroka hakêm dest pê kir.

Kadroyên tîman

Sevilla: Bono, Navas, Bade, Gudelj, Telles, Fernando, Rakitic, Oliver, Ocampos, Bryan Gil, En-Nesyri

Teknîk dîrektor: Jose Luis Mendilibar

Roma: Patricio, Ibanez, Mancini, Smalling, Zeki Çelik, Cristante, Matic, Spinazzola, Pellegrini, Dybala, Abraham

Teknîk dîrektor: Jose Mourinho
SEVILLA YEKEMÎN E

Sevilla ew tîme ku heta niha herî zêde ev kûpa girtiye: 6 caran. Piştî vê Milan, Juventus, Liverpool, Atletico Madrid her yekî 3 caran ev kûpa girtiye. 

Tîma Romayê tenê carek di sala 1991'ê de ev kûpa biriye mala xwe.

Li aliyê din ji her du teknîk dîrektoran Mourinho 2 caran ev kûpa girtiye, lê Mendilibar ev kûpa qet negirtiye.
DEQE BI DEQE
Deqe 34: Di destpêka maçê de heta nîv saet Roma li pêş bû. Şûtek wan hebû, lê di deqîqeya 34'an de bi Dybala firsend dît û Dibala gola xwe avêt: 1-0.

Dq 45+5 lîstikvanê Sevilla Rakitic bi lingê çepê ji derveyî pêş kelehê şûtek mikemel avêt, le gog ji dîreka qeleyê vegeriya.
Di deqeyên zêdek de Sevilla kona xwe li ber keleha Romayê danîbû lê nekarî encamê biguherîne. Nîveka yekemîn bi 1-0 bi dawî bû. 

Dq 55, kaptanê Romayê Mancini gol avêt keleha xwe. Lîstikvanê Sevilla Navas gog sert şand nava sehaya pêş kelehê, gog li Mancini ket û çû nav torê: 1-1.
Dq 90: Her du tîman nekarî encamê biguherînin û maç derbasî nîv saetê zêdek bû. Dê 30 saetê din bê lîstin. Ger wekhevî neguhere, dê maç here penaltiyan û serketî diyar bibe.
ÎSTATÎSTÎK

Di 90 deqîqeyên maçê de îstatîstîk Sevillayê nîşan didin: Sevillayê 16 şût avêtin, beramberî vê Romayê bi 8 heban bersiv daye. Lê yê Sevilla 2 heb bi îsabet bûne, yê Romayê 4.

Sevillayê bi sedî 66 bi gogê lîstiye, Romayê sedî 34. Di pasan de jî Sevilla li pêş e: 495-272
132 DEQÎQE: 1-1

Dq 120+12, tam 132 deqe gog li nava sehayê bû û encam diyar nebû. Niha dora penaltiyan e. Di deqîqeyên dawî yên vê zêdekê de Romayê çend gogên serbestatişê bi dest xistin, lê nekarîn jê sûde bigire. Û hakêm li firfirokê da.