Diyarname
Romana Mîran Janbar a nû ya bi navê “Qolyeya Cécileê” ji Weşanên Lîs derket. 

Janbar, Qolyeya Cécileê, ya çaverêkirî ya bi çeşnê têkelê honaka zanistî, aksiyon û evînê, gihişte ber destên xwendevanên Kurd.

Nivîskar Mîran Janbar ku heta niha romana bi navê “Ardûda” (Lîs, 2004) û pirtûka ji bo zarokan “Azad” (Lîs, 2006) derxistibû vê carê bi romaneke din derket pêşberî xwendevanên xwe.
Qolyeya Cécileê “çîrok”a Cécilea zanista frensî ya ji Zankoya Sorbonneê ya Parîsê û Remezanê Kurd ê arkeolog ê ji heman zankoyê û evîna wan e, ku di nava honaka mişt bizav a romanê re, Remezan rojekê qolyeyeke ku ji kevirekî ji Şikefta Pîrazê ya li gundê xwe, Emrûda bi ser Qosera Mêrdînê ve derxistî çêkiriye, diyarî Cécileê dike. Lê ev qolyeya ji kevirê wê şikeftê bi destê Remezan bi xwe çêkirî, ji ber ku pirtikekî elementeke aîdî keştiyeke galaktîk e, ya ku di binê wê şikeftê de hatiye veşartin, sînyalan li derdora xwe belav dike. Û bi vê nîşaneya evînê ya metirsîdar re jî, ji ber lêkolînên A.F.R.T.’yê (Akademiya Teknolojiya Nijadên Dahatûyê) ya li Çola Nevadayê ya Amerîkayê, ya ku bi dizîka ve, bi serkariya Profesor Smith,  li ser navê Shany-X (Şeytanê Mezin, formeke enerjiyê yê galaktîk ê ku di şerên galaktîk de demeke dirêj berê li hemberî serhildêrên galaksiyên dûr têk çûye û anîne ew di hundirê Şikefta Pîrazê ya li gundê Remezan, Emrûda Qosera Mêrdînê de, di binê erdê de, tevî wê keştiya wî ya galaktîk, wekî dîl veşartine) li ser karê hilberandina teknolojiya galaktîk e, bûyer û qewamine wisa metirsîdar rû didin ku êdî qedera dahatûya hemû cîhanê û mirovahiyê bi şerê di navbera leşkerên Shany-X û hêza Seyda, Mela Ehmedê efsûndar ê melayê gund û Remezan û Cécileê û pênc gerîlayên li wê deverê de, bi şerê li Emrûd, li devera Şikefta Pîrazê ve tê girêdan.
Qolyeya Cécileê bi windabûna Cécileê re dest pê dike, ku rojekê Cécile ji nişkê ve Remezan diterikîne û tu dibêjî qey dibe birq û birûsk û roman bi vegera Remezan bo gundê xwe û çûyîna Cécileé bo xebatên zanistî yên li A.F.R.T.’yê ve, yên ku di nava têperbariya deqa romanê ya demî û cîgehî re, li qewareya puzzleekê diedilin, berê xwendevanê kurd dide honaka zanistî, aksiyonê, evîneke bêmiraz, ji gundê Emrûd ê Qosera Mêrdînê heta Parîsê û Çola Nevadayê ya li Amerîkayê, bi destê xwendevanê xwe digire û digerîne.

Qolyeya Cécileê / Mîran Janbar / Roman / 362 rûpel / Adar 2012 / Weşanxaneya Lîs