Diyarname

12 saziyên ku li ser ziman û çandê xebatên xwe didomînin li ser binçavkirinên îro daxuyaniyeke nivîskî belav kirin û xwestin yên hatine binçavkirin bêne berdan.

Di daxuyaniya saziyan de hat gotin ku  îro li 21 bajaran li hemberî zimannas, rojnameger, parêzer, hunermend, aktîvîst û siyasetmedarên kurd operasyoneke qirkirina siyasî hate kirin û ji 100’î zêdetir kes hatine binçavkirin û wisa hat gotin: “Çawa ku ev cure operasyonên qirkirinê bi tu awayî bi ser neketine, berevajî wê yekê, têkoşîna gelê kurd a ji bo maf û azadiyê xurttir kiriye, ev operasyona qirkirinê jî dê bi tu awayî bi ser nekeve. Gelê kurd ji destpêka avabûna Komara Tirkiyeyê ve ji bo maf û azadiya xwe têdikoşe û di vê rêyê de bi berdêlên giran destkeftiyên giranbiha bi dest xistine. Lewma jî bi girtin, kuştin an jî çavtirsandinê nikarin van destkeftiyan ji destê gele kurd derxînin. Tevî hemû êrîş, zext û kuştinên van salên dawî û salên borî gelê kurd û saziyên gelê kurd gavek jî ber bi paş ve neavêtiye û dê neavêjin jî. Ew ê xwedî li ax, ziman û hebûna xwe derkevin.”

Di daxuyaniyê de hatiye gotin ku zehtên li ser gelê kurd di dema desthilatdariya  AKP-MHP’ê de gihîştine lûtkeya xwe. Saziya diyar kiriye ku yek ji armancên van operasyonan lawazxistina xebatên zimanê kurdî pêşvetirbirina polîtîkayên asîmîlasyonê ye û wiha hatiye gotin: “Di çarçoveya vê polîtîkayê de her tim saziyên zimanê kurdî û mamosteyên zimanê kurdî tên hedefgirtin. Di vê operasyona qirkirinê de jî mamoste û kedkarên zimanê kurdî Rifat Ronî, Nesîb Gultekîn û Osman Çetînkaya hatine binçavkirin. Hemû rojnameger, hunermend, kedkarên zimanê kurdî û siyasetmedarên ku îro hatine binçavkirin û bi awayekî nehiqûqî û dijminane hatine girtin, hûn ê nekarin wan ji têkoşîna azadî û wekheviyê dûr bixin û ev têkoşîn dê van operasyonan pûç bike. Em careke din destnîşan dikin ku divê hemû girtî û binçavkiriyên siyasî derhal serbest bên berdan û dibêjin ku berdêl her çi dibe bila bibe, em ê dest ji têkoşîna xwe ya ji bo azadî û wekheviyê bernedin û em ê di her şert û mercî de vê têkoşînê bidomînin.”

Saziyên ku bi hev re daxuyanî belavkirine ev in:

Enstîtuya Kurdî ya Amedê – Amed

Enstîtuya Kurdî ya Stenbolê – Stenbol

Komeleya Lêkolînên Çand û Ziman a Avestayê – Îzmîr

Komeleya Lêkolînên Çand û Ziman a Botan – Sêrt

Komeleya Lêkolînên Çand û Ziman a Feradê – Semsûr

Komeleya Lêkolînên Ziman û Çandê ya Arî-Derê – Êlih

Komeleya Lêkolînên Ziman û Çandên Mezopotamyayê – Amed

Komeleya Navenda Lêkolînên Ziman, Çand û Hunerê ya Arsîsayê – Wan

Komeleya Wêjekarên Kurd – Amed

Komeleya Ziman û Çandê ya Birca Belek – Cizîr

Komeleya Ziman, Çand û Hunerê ya Enqayê – Enqere

Kovara Destar – Amed

***

Nûçeya Eleqedar:

- Gelek rojnameger, şanoger, muzîkar hatin binçavkirin