Diyarname
We TRT Şeş da, lê li vê kanalê berî bikeve xewê hûn nikarin ji bo zarokan çîrokek bibêjin.
Cîgirê Serokê Giştî yê AKP'ê yê berê Dengîr Mîr Mehmet Firat ji bo Neşe Duzel axivî (28.11.2011, Taraf). Em gotinên wî yên di hevpeyvînê de werdigerînin û pêşkêşî we dikin:

- Ji Reşkotan heta raman, Mutkî, Oramar tu yek jî ne serhildan e. Di belgeyên Serleşkeriya Giştî de ev yek têne dîtin. Jixwe du serhildanên kurdan hene. Yek jê Serhildana Şêx Seîd, ya din Serhildana Agiriyê ye. Lê ji çilî zêdetir tevger hene û Dêrsimj î yek ji van tevgerên tenkîlê (Bi temanî ji holê rakirina neyaran an kesên bizirar) ne. Ji bo netewe-dewletê ava bikin û yek tîp mirovî saz bikin, tevgerên asîmîlasyonên ne.

- Di nav dîroka Komarê de gelek bûyerên herêmî hene. Mînak 33 kes hatine gulebarankirin, 80 kes bi hev re hatine kuştin, wekî van. Mînak bûyera "Pira Reş" heye, di dema Partiya Demokrat de  li ser vê li meclisê lêkolîn tê kirin. Mebûsê Mêrsînê apê min Huseyîn Firat jî endamê komîsyonê bû, digot: "Bi fermanê 40 kes hatine kuştin. Di vê komkujiyê de îmzeya erêkirina hemû mezinên dewletê heye. Îsmet Paşa jî têde." Ev dosya ji aliyê rêveberiya DP(Partiya Demokrat) ji holê tê rakirin. Apê min ji min xwestibû ku dema ez bibim mebûs ez li ser vê dosyayê bixebitim. Ger lêkolîn Bê kirin dê pir belge derên. Dê reqem û kuştinên mezin derên. Ji ber ku hê gelek belge kêm in. Hê devê nivîsên Serfermandariya Giştî, arşîvên wan nehatine vekirin. Ji bo vê yekê pêdivî bi biryarê jî nîn e. Serokê meclisê bi fermanekê dikare van arşîvan veke.

- Encax arşîv vebin emê Serhildana Şêx Seîd fêm bikin. Ji ber ku ew serdemeke balkêş e. Di têkbirina serhildanê de komkujiyeke girseyî heye. Her wiha şîdet yi wê derê nesekinî, di salên 1930'î de jî dom kir. A rast Dêrsim, berdewama Serhildana Şêx Seîd e.

- Tu têkiliya malbata min bi Serhildana Şêx Seîd re jî, bi bûyera 1937'an a Dêrsimê re jî nin e. Ji ber ku malbata me sunnî ye. Bi ser de jî di dema Şerê Îstîklalê de jî Madalyaya Îstîklalê ya sor-kesk ku ya serketina mezin e dane wan. Hemû endamên malbatê di sala 1926'an de piştî Serhildana Şêx Seîd ji Semsûrê hatiye sirgûnkirin, dest danîne ser mal û milkê wan. Serê sibeheke her kes girtin birin. Ji Kolikê bi piya, 110-120 kîlometre heta Golbaşiyê birin, li wir siwarê trênê kirin û şandin sirgûnê.

- Li Tirkiyeyê pirsgirêka kurd, pirsgirêka hemwelatiyê ye. Li vî welatî dupergalî heye. Yek, hemwelatî heye. Yek jî tebaa (Nota werger: hemwelatiyê duyemîn, yan jî yên bê maf) heye. Ger hûn vê dupergaliyê rakin, li holê dê pirsgirêka kurd nemîne. Dê her kes bibe hemwelatî û wekhevî çêbe.

- Yê min hêviya min nîn e ku dê Zagona Bingehîn a nû bê çêkirin. Ji vê meclisê Zagoneke Bingehîn a nû dernayê. Jixwe ji bo derneyê jî her tişt kirin. Du partiyan got "sê xalên zagona heyî nayên guhartin". Ger xalên nayên guhartin bimînin çi pêdivî bi zagoneke nû heye...
Belê. Ev rêbaz ji aliyê AK Partî ve hat qebûlkirin. Ez Ak Partî ji yên din cuda nakim. Yek ji partiyên li hev kir ku Zagona Bingehîn bi vî awayî saz bike jî Ak Partî ye.

- Divê pêşî em ji tiştên pêkenî xilas bibin. Pesnê didin ku TRT Şeş vebûye. Baş e, hûn dizanin bi zimanê kurdî sazkirina bernameyan qedexe ye? Hûn pê dizanin ku di TRT Şeşê de çêkirina bernameyên li ser zarokan qedexe ye? Çima qedexe ye? Ji ber ku yên ziman hîn bibin zarok in. Ji bo pêşî li hînbûna kurdî ya ji aliyê zarokan ve bigirin qedexe danîne...

- Belê AKP TRT Şeş vekir û rêzinmameya wê çêkir. Li dinyayê gelek alfabe hene. We qet dîtiye li welatekî tîp qedexe bin? Ji bo qedexeya li ser tîpên Q, X, W rabe pêdivî bi guherîna Zagona Bingehîn nîn e. Pê bizanin ku hûn hê jî tîpan qedeXe dikin dê di kovarên mîzahê de cih bidin we. Yek ji qedexeyên pêkenînî jî navên herêman e. Navên bi kurdî yên cihan dane wan? Na. Ji bo vê pêdivî bi guherîna Zagona Bingehîn heye? Na.

- Binêrin navendên perwerdehiya gel ên girêdayî Wezareta Perwerdehiya Neteweyî hene. Armanca van ew e ku hin jîrekiya gel pêş bixe û zimanên biyanî bi wan bide hînkirin. Dê kîjan zimanan hîn bibin wezaret diyar dike. Di nav lîsteyê de nêzî sed zimanî heye, lê kurdî, lazî nîn e. Wezaret kurdî û lazî li lîsteyê zêde bike bes e. Ev yek tenê jî nayê kirin. Bi van tiştên pêkenî jixwe em ji kurdan re dibêjin 'Hûn ne hemwelatî ne." Em zagonê biguherînin û bibêjin "Hûn wekhev in" dê çi bibe, heta ku ev tiştên pêkenînî hebin. Bi van qedexeyan dê kurd dîsa nebin hemwelatî.

- Sînorên me hemûyan hene. Dibe ku Tayyip beg jî hatibe ber sinor. Dibe bibêje, "Hûn ji min çi dixwazin? Hûn hê zêdetir çi dixwazin? Vaye min TRT Şeş da we." We TRT Şeş da, lê li vê kanalê berî bikeve xewê hûn nikarin ji bo zarokan çîrokek bibêjin. Ev qedexe ye! Mînak zagona paşnavê heye. Ji Zagona Partiyên Siyasî heta Zagona Têkoşîna bi Terorê re gelek qedexe hene. Ev hemû tenê bi xalekê, di rojekê de dikarin bêne guhartin. Dema we got, ev, ev, ev, ev aliyê vê xalê ji holê hatin rakirin, wê çaxê êdî pêdivî pê namîne ku hûn di ZAgona Bingehîn de pênasa hemwelatîbûnê jî rakin.