Bilal Guldem / MA / AMED

Li Sêwregê kulîlkên sor ango bûkanî li erdên beyar şîn bûne û bihara wir xemlandiye. Gel bi kêfxweşî diçe nav van kulîlkan û fotoyan dikişîne, demek xweş derbas dike.

Li ser rêya navçeya Sêwregê ya Rihayê bi hezaran donim erd bi kulîlkên sor ango bi bûkaniyan xemilî ne û ev erdên bê ser û binî veguheriye rengê sor. Bi hatina biharê re erdê Kurdistanê yaê bi xêr û ber dibe bihuşta rengan û bi rengê xwezayê û kulîlkên rengîn dixemile. 

Li erdên beyar ku kulîlkên sor lê vebûne, di ketina navçeya Sêwregê de ye û ev rengên xweşik xemla xwe dane navçeyê. Ji ber ku ev cih veguheriye dîtbariya sirûştî ku li ser rêya Riha û Amedê ye, rojane bi hezaran kes lê disekinin û wêneyên xwe di nava kulîlkan de digirin.  

Li aliyekî welatî tên nav kulîlkan bi kêfxweşî wêneyan digirin û destikên kulîlkan ji xwe re çêdikin û li gel xwe dibin, li aliyekî jî siwar hespên xwe li nav erdên veguherîye rengê sor didin çargaviyan. Lê keriyên pez û ewrên spî jî xemla xwe didin vî rengê sirûştî, ahenga rengan radikeve ber çavan. 

Hin wêneyên ku ketin ber objektîfa me hêjayî dîtinê ne (Ji bo fotoyan lînkê bitikînin):

-  Axa me bi kulîlkên sor xemilî

Têbinî: Bêyî destûra Bilal Guldem û MA'yê bikaranîna fotoyan li cihek din qedexe ye.