HEWLÊR
Serokê Herêma Kurdistana Federe Mesût Barzanî got: "Di nav kurdan de tu demê dê êdî şerê birakujiyê çênebe. Kurd her bindest man. Lê êdî mafê gelê kurd jî heye ku azad bibe."

Barzanî di 3'yemîn Kongreya Tenduristiyê ya Mezopotamyayê ku li Dihokê li dar ket de axivî.

Barzanî got ku kurd mecbûr man şerê çekdarî bidin dest pê kirin û wisa dom kir: "Yek li vê parçeyê, yek li parçeyê din mecbûr man ku şerê çekdarî bidin dest pê kirin. Di vê pêvajoyê de me gelek qurban dan. Ji bo mafên xwe yên neteweyî em mecbûr bûn wisa bikin. Di encama vê têkoşînê de îro li Herêma Kurdistana Federal em xwedî statuyekê ne.

Barzanî got ku tu ferqa kurdan û ereb, fars û tirkan nîn e û ev yek li gotinên xwe zêde kir: "Peyama me aştî ye. Divê em bira bin. Divê birayên me yên ereb, tirk û fars bizanin ku herî hindik bi qasî wan mafên me jî hene û gere li her parçeyê em bigihîjin mafên xwe. Dewletên dinyayê û siyaseta wan guherî divê em jî biguherin. Di dema ku divê me şer bikira me kir. Li gor asta em gihîştine, di rewşa heyî de jî şer divê lê divê em bi rêya demokratîk vê têkoşîna xwe bidomînin."

Ji DÎHA'yê hatiye girtin