Ronî WAR

Ev çendeyeke li ser difikirim û ji xwe dipirsim. Gelo ji bo ku mirov di çapemeniya kurdan de bibe nûçe çi hewce dike?

- Mirovek ji ber Komeleyeke Nivîskarên Kurd ji kar hatibe avêtin, gelo ev doza dibe nûçe?

Na ev ne bes e. Karê kesî di te de tune be, bimre. Qîra te kiriye ma kê ji te re got, here bibe rêveber û endam. 

- Mirov ji ber qunciknivîsiya rojnameyeke tahdê bibîne dibe nûçe?

Na, ev jî pûç e. Ne ew qas girîng e ku nivîskarek, ji ber ku di Azadiya Welat de nivîsiye tehde lê were. 

Baş e, heger mirovek ji ber komeleyeke kurdî mexdûr dibe û wekî çapemenî tu nakî nûçe, ji ber ku di rojnameyeke de bi kurdî dinivîsî tehde lê tê û tu nakî nûçe tu doza çi dikî?

Gelo tu bîr nabî ku tu bi bêdengiya xwe piştgiriyê didî komisyona OHAL'ê û dadgeha ku biryara OHAL'ê di cih de dibînî.

Tu nûçeya daran, kêzikan, ezmanan, dîn û baqilan çêdikî, çima doza mirovekî ji ber kurdî mexdûr dibe bala te nakişîne?

Qey gelekî zehmet e? 

Na, tevdekî wê nûçeyeke ji çend rêzika ye.

Ma, ew ê malê te lê here?

Na, ji xwe rojname derdikeve û di televîzyonan de jî saeta nûçeyan heye.

Ma, bi kurdî nivîsandin û endamtiya komeleyeke kurdî tiştekî qebhet e?

Na, her roj hûn dibêjin kurdî rûmeta me ye.

Naxwe çi?

Baş e ku medya sosyal û wekî din rêyên ku mirov pê bigihîje raya giştî hene. Ne ku ji kesî dixwazim hûn bikin nûçe, ji bo min qîmeta wê nema ye, dixwazim rastiyekê raxim ber çavan. Ev nivîs belkî niha bala we kesî nekişîne û hûn kes guh nedinê. Bi baweriya min divê van pirsana bihatana kirin û ji dîrokê re bimaya loma dinivîsim.