Diyarname

Piştî ku DYA'yê biryara vekişandina leşkerên xwe ji Afganistanê da, rêxistina Talîban êrîşên xwe gur kirin û bajar bi bajar bi dest xistin. Talîban ku di nav lîsteya terorê de ye, hat gotin îro paytexta welat Kabîl jî bi dest xist.

Hat îdîakirin ku Serokomarê Afganistanê Eşref Gani welat terk kiriye.

Li aliyê din ji Afganistanê ev çendek e her koçber tên. Bi taybetî bi ser Îranê re gelek jê tên Tirkiyeyê

Serokomarê Tirkiyeyê Recep Tayyîp Erdogan îro piştî ku Talibanê Kabil girt destê xwe axivî û got: "Ji bo gavek zûtir Afganistan bikeve nav îstîkrarê çi ji destê wan bê dê bikin."

Va ne hin agahiyên din:

- Ev mehek e Taliban gav bi gav bajaran digire dest. Tê gotin dema Kabilê bi temamî bi dest bixe ligel hikumeta heyî dê nîqaşa dewrgirtina rayeyê bike û bibe destilatdar.

- Li gor Neteweyên Yekbûyî di mehek de li dor hezar kesî di pevçûnan de can daye.

- Bi deh hezaran kesî mal û milkê xwe terk kiriye.

- Li gor agahiyên îro ji 34 eyaletên Afganistanê Talîban tam 28 eyalet girtine bin destên xwe, 6 eyalet hê di bin kontrola hikumeta heyî de ne.

- Gelek welatan biryar daye ku xebatkarên xwe yên li welat vekişin.

- DYA'yê ragihand û got ku Taliban dest bide xebatkarên me emê bi lez û bi bandor li wan bidin.

Taliban çi rêxistin e?

Rêxistina Talîbanê di sala 1994'an de hatiye avakirin. Wekî peyv Taliban ji erebî tê û di watena "Xwendekar" de ye. Molla Omer Ahund ligel 50 xwendekarên xwe ew ava kir. "Li Afganistanê sazkirina rêveberiyeke li gor îslamê" ji xwe re kir armanc. Niha gelek welatan ew xistiye nava lîsteya terorê. Îmaja Talibanê ya li dinyayê jî ev e.