Fethî Balaman / MA / ÊLIH

Serîlêdanên 11'emin Pêşbazîya Çîrokan a Şerzan Kurt dest pê kirin. Yên bixwazin divê heta 15'ê rezbera 2021'ê berhemên xwe bişînin.

Xwendekarê Zanîngeha Mûglayê Şerzan Kurt, di 12'ê gulana 2010'an de di dema bûyerên xwendekaran de bi çek hatibû kuştin. Egîtîm-Sena Êlihê ji wê demê li ser navê wî pêşbaziya çîrokan li dar dixe. 

Niha dema serîlêdanên pêşbaziyê dest pê kirin. Di pêşbazîyê de çîrokên bi kurdî û tirkî tên qebûlkirin. Dîroka dawî ya serlêdanê 15'ê îlonê/rezberê ye. Xelatên pêşbaziyê dê di 9'ê mijdara/sermaweza 2021'ê bên belavkirin.

Îsal di beşa kurdî de Çorê Arda, Rengîn Kardelen, Bûrhan Tek, Mûrad Dildar, Ferhadê Mihemed û Omer Kurt (bavê Şerzan Kurt) endamên juriyê ne û di beşa tirkî de jî Bîrgul Sevînçlî, Gamze Guller, Sûzan Bîlgen Ozgun, Menekşe Toprak, Şengul Can û Nejla Kûrt (dêya Şerzan Kûrt) endamên juriyê ne.

Serokê Egîtîm-Sena Êlihê Nûrettîn Şîmşek, anî ziman ku polîs Gultekîn Şahîn ku Şerzan Kurt kuştibû, li Êlihê dixebitî û malbata Kurt nas dikir û piştî tayinî Mûglayê hatiye kirin, li wir Şerzan Kurt kuştiye. Şîmşek got ku ew vê pêşbaziyê ji bo bîranîna Kurt li dar dixin. 

Şîmşek, diyar kir ku pêşbazîya çîrokan ji ber kayûmên tayinî şaredariyê hatine kirin û ji ber pandemiyê, 5 sal in bi beşdariyeke hindik çêdibe, lê îsal dê merasîma xelatê bi awayekî girseyî li dar bixin. 

Şîmşek, destnîşan kir ku di vê pêvajoyê de herî zêde êrîş li ser kurdî çêbûne, lewma dê xelatê ji xeynî kesên di qada çîroka bi kurdî serketine, bidin kesên di warê kurdî de dixebitin jî. Şîmşek, anî ziman ku armanca wan tevkariya kurdî bikin.