Diyarname

Rewşenbîr û nivîskar Osman Sebrî di serdema kovara Ronahî de gelek kedê dide. Hin ji xebatên wî yên wê demê jî nivîsên wî yên li ser Napolyon û Selaheddînê Eyûbî ne ku di kovara Ronahî de hatine weşandin. Ew nivîs wekî pirtûkek li ber destan in.

Weşanxaneya Belkî di sala 2011'an de rêzenivîsên Osman Sebrî ji koranê dan hev û bi navê "Napolyon & Selaheddîn" wekî pirtûkek weşand.

Ji nivîsên vê pirtûkê yekem nivîs Sebrî di hejmara 16'an a kovarê de (1 tîrmeh 1943) weşandiye û ya dawî di hejmara 28'an de hatiye weşandin. Jixwe bi vê hejmarê re kovara Ronahî jî dawî li weşana xwe aniye.

Osman Sebrî destpêka dîroka wan ji bo xwendevanan tîne ziman heta ber bi qralbûna wan. Helbestvan û weşanger Rênas Jiyan ku pirtûk amade kiriye û ji bo bo pirtûkê pêşek nivîsiye, dibêje, "Helbet wî ev her du şexsiyetên dîrokî nêzî xwe dîtine. Yek, Selaheddîn jixwe bi kurdbûna xwe nêzîkî wî ye û dudu, Osman Sebrî jî wekî her du şexsiyetan şervanek e û wî jî enî û herb dîtine û jyaye. Her du leheng jî Napolyon û Selaheddîn du fermandar û qral-împaratorên girîng in di dîroka cîhanê de, yek lehengê rojavayî ye û yê din lehengê Rojhilatê ye; a rast Selaheddîn ne tenê lehengê Rojhilatê ye jî ji ber ku Selaheddîn lehengekî adil û etîk e ev jî bûye sedem ku hemû dinya bibe heyranê wî. Lê qet bêguman heyranên Napolyonî jî pir in."

- Napolyon & Selaheddîn / Osman Sebrî / Amadekar Rênas Jiyan / Weşanên Belkî / Dîrok /2011