Amed

Li hemberî biryara Dadgeha Zagona Bingehîn ku der barê Hatip Dicle de biryara "Bêrayetî" da, parêzerên wî serî li DMME'yê (Dadgeha Mafên Mirovan a Ewropayê) didin. Ji parêzerên Dîcle, Ferîde Laçîn diyar kir ku ew ê vê biryarê û 3 biryarên di salên 1994 û 2011'an de hatine dayîn bibin DMME'yê û ev biryarên ku der barê Dîcle de hatine dayîn bi zanebûn hatine dayîn.

YSK'ê mebûsa Hatip Dicle betal kir. Parêzerên Dicle herî dawî serî li Dadgeha Zagona Bingehîn da, lê wê dadgehê jî bi sedema "Rayeya wan li ser vê tune ye" daxwaza parêzeran red kir.

Parêzer Ferîde Laçîn der barê biryarên ku hatine dayîn de got ku ev biryar sîstematîk in. Laçîn got ku ew ê van hersê mijaran jî bibin DMME'yê.

Parêzer Muharrem Şahîn jî got ku betalkirina parlamenteriyê encax di meclisê de dikare bê kirin, ji ber vê jî wan serî li Dadgeha Zagona Bingehîn dabû. Şahîn da zanîn ku divê mazbata nedana Oya Eronat, biryara ku Dadgeha Zagona Bingehîn daye şaş e. 

Serokê Komeleya Hiqûqnasên Hemdem (ÇHD) Selçuk Kozagaçli jî got ku ev pêvajo di serî de heta niha nehiqûqî ye û wiha berdewam kir: "Li gel madeya 53'yemîn ev qanûn tune hate hesibandin. Krîz hate vê astê. Lê Dadgeha Zagona Bingehîn wekî navnîşan tê nîşandan. Ev niyetên ne baş in, ez wisa difikirim. Tiştê ku bê gotin ew e, tevgere siyasî ya kurd ketiye parlamentoyê, divê ev maf neyê astengkirin. Krîza ku dema Serokwezîr Erdogna de derket dikare ji bo Hatîp Dîcle jî bê çareserkirin. Berî ku meclîis bikeve betlaneyê divê guhertin bên kirin û krîz bê çareserkirin."

Parêzer Eren Keskîn jî da zanîn ku bingeha krîza ku derketiye Zagona Bingehîn a 12'yê Rezberê ye û berpirsyarê vê jî meclis e, divê ji ber vê yekê Zagoneke Bingehîn a nû bê amadekirin. 

Parêzer Meral Daniş Beştaş jî bilêv kir ku ev biryar ne hiqûqî ye û li gorî peymanên navneteweyî jî nîn e, derveyî demokrasî û hiqûqê ye. Daniş got ku ev biryar dê pêşerojê de pir bê nîqaşkirin û ji ber vê yekê jî divê rayedarên hikumetê bikevin nav hewldanan. 

Ji Baroya Amedê Fuat Coşacak jî wiha got: "Ev daxwaza me ya ku hatiye redkirin ne li gorî feraseta hiqûqê ye. Divê ev pirsgirêk di warê siyasî de bê çareserkirin. Em ê vê biryara ku hatiye dayîn ji miwekîlên xwe re ragîhinin û piştre vê jî biryarê bibn Dadgeha Mafên Mirovan a Ewropayê."

DÎHA