Diyarname
Senarîst û derhênerê navdar Zekî Demîrkubuz senaryoyên ku nivîsandibûn ji bo çapkirinê dabûn weşanxaneyê lê senaryo li holê nîn in. Demîrkubuz dê dozê li weşanxaneyê veke.
Demîrkubuz li ser vê yekê ji ser hesabê xwe yê tora civakî re peyam weşand lê paşê ew peyam jê bir û peyamek nû belav kir. Di vê peyamê de fotoyê berga senaryoya "Buluntu" parve kir û pêre wisa nivîsî "Ji ber sedemeke mirovî min twita li ser windabûna senaryoyan jêbir. Lê mijar bi dawî nebûye, li holê windakirin an jî dizî heye. Dê doz bê vekirin û dema kiryar diyar bibin dê bêne eşkerekirin. Yên ku haya wan ji 6 cildên wekî vê hebin bila agahî bidin vir: info@zekidemirkubuz.com"
Derhêner Zekî Demîrkubuz di bala 1964'an de li Ispartaya Tirkiyeyê hatiye dinê. Di sala 1986'an de wekî asîstan dest bi sînemayê kiriye. Yekem fîlmê xwe yê metrajdirêj bi navê "C Boluk" di sala 1994'an de kişandiye. Fîlmê wî yê duyemîn "Masumiyet" li Festîvala Fîlman a Venedîkê hat nîşandayîn û bi vê navdar bû. Fîlmê wî yê sêyemîn "Uçuncu Sayfa" ligel Locarno, Rotterdamê li gelek festîvalên Ewropayê hat nîşandayîn. Fîlmên wî "Yazgi" û "Îtîraf" di sala 2002'yan de li Festîvala Fîlman a Cannesê di beşa "Un Certain Regard" de hatin nîşandayîn û sêbareya van her du fîlman "Bekleme Odasi" di sala 2003'yan de temam kir. Wî di sala 2006'an de "Kader", 2009'an de "Kiskanmak", di sala 2012'yan de "Yeralti" kişand. Paşê bi "Bulanti" (2015) û "Kor" (2016) derket pêşberî temaşevanan.
Demîrkubuz ji Festîvalên Stenbol, Enqere, Antalya, Numberg, Dubaî xelat girtine. Her wiha ji Siyadê jî Xelata Derhêner û Fîlmê Herî Serketî girtiye.