Diyarname
Yekîtiya Mamosteyên Kurd (YMK) li Ewropayê vê mehê kongreya xwe li dar dixin û her kes vexwend vê kongreyê.

Di nav her civakî de mamoste ciheke taybet digirin, ji ber ku gel zarokên xwe teslîmê wan dikin. Li nav kurdan jî qîmeta mamosteyan heye. Yek ji van rêxistinên mamosteyan Yekîtiya Mamosteyên Kurd a li Ewropayê ye. Ev yekîtî niha dê 25'ê vê mehê de kongreya xwe li dar bixe.
YMK'ê ji bo kongreyê daxuyaniyeke vexwendinê weşand û got: "Wekî gelê kurd, divê em bi hemû hêz û zanebûna xwe, li dora sazî û dezgehên xwe kom bibin, wan xwirt û bihêz bikin. Ev dibe bersiva hewldana înkar û tunekirina gelê me. Her çiqas em li derveyî welat bin jî, wekî mamosteyên kurd, hin erkên me yên xwezayî hene. Xwedîderketina li ziman, çand, dîrok û hwd. Xebat û fedakariya vê qadê wek zanyar,
perwerdevan, mamoste û ronakbîr, deynê stûyê me hemûyan e. Hilgirtina kar û barên vê qadê jî, karê kesên xwedîxîret û xwedîwijdan e."

YMK'ê her kes vexwendine kongreya xwe û wisa gotiye:
"Eger hûn dixwazin para xwe bixin nav hînbûn û pêşketina zimanê kurdî ji bo pêşeroja me, ji bo zarokên kurd,
Eger hûn dixwazin li hemberî pêlên asîmîlasyon û qirkirinê bibin çeperên ronakbîrî,
Eger hûn dixwazin ewrên reş û tarî, yên bi ser pêşeroja me ve tên bela-wela bikin,
Eger hûn dixwazin bi pênûs û wijdanê xwe li hember barbariyê şer bikin,
Eger hûn dixwazin li hember teyrên kergez- şevşevokên sedsala 21'an têbikoşin...
Kerem bikin, bêşdarî kongra me bibin, wê xurt û geş bikin."