Diyarname
Radyoya BBC Tirkî ku demekê kurdan jî jê zêde werdigirt piştî 72 salan hat girtin.

Beşa Tirkî ya Radyoya BCC sala 1939'an de dest bi weşanê kir. Radyo ev 72 sal in weşana xwe ya bi tirkî dikir û niha ev beş hat girtin.  Radyo di salên Şerê Cîhanê yê Duyemîn de li ser delxeya kurt weşan dikir, di salên pêş de li gor şirîkên li Tirkiyeyê di banda FM'ê de jî weşan kir. Radyoyê roja 27'ê gulana 2011'an de li gor saeta Tirkiyeyê di saet 18.00'an cara dawî weşana xwe kir û xatir xwest.

Radyo niha dê tenê bi ser înternetê re weşanê bike. Beşên BBC yên tv, radyo bi alîkariya hikumeta Îngilistanê li ser piyan in. Hikumetê jî ji beşa tenduristî bigire heta weşanê di gelek waran de butçe teng kir. BBC ku bi 32 zimanên cihê weşanê dike butçeya wê sedî 25 hat birîn. Bi vê yekê re jî rêveberiya BBC dest bi lêgerînan kir û di encamê de hin beşên BBC girtin. BBC TV'yê li Tirkiyeyê bi NTV ve ket nav weşaneke nû û weşana wê ya bi tirkî di NTV de jî tê weşandin lê beşa radyoyê ya bi tirkî hat girtin.

Digel beşa tirkî ya radyoya BBC beşên bi zimanên wekî makedonî, arnawûdî, sirbî, karayîpî (bi îngilîzî) û afrîkî (portekîzî), rusî, spanyolî (ji bo Kubayê), ukraynacî û wîetnamî hatin girtin.

Beşa tirkî ya radyoya BBC hat girtin lê li ser înternetê weşana wan didome.

Çavkaniya kurdan bû jî

Beşa tirkî ya BBC demekê çavkaniya sereke ya kurdan bû jî. Bi taybetî di destpêka salên 90'î (1990, 91, 92) pirahiya li gundên kurdan ji bo agahiyên li ser şer di saet 18.00'an de guhê xwe didan Radyoya Tirkî ya BBC. Di vê dema ku li Tirkiyeyê hê televîzyonên taybet nîn bûn, zêde radyo û amûrên ragihandinê yên din zêde nîn bûn de BBC Beşa Tirkî ji bo wan çavkaniya sereke bû. BBC Tirkî ku wekî TRT'ya Tirkiyeyê ji hêzên çekdar ên kurd re nedigot "terorîst" û digot "Mîlîtan", yan jî "hêzên çekdar ên kurd" vê yekê zêdetir dikir ku kurd bi nûçeyên wê bawer bin. Taybetiya BBC li dinyayê (hê jî) ew e ku ew pênaseyan bikar nayne.

BBC ku bi gotina "Burası BBC Londra" (Ev der BBC Londra ye) dest bi weşanê dikir di nav jiyana gelek kurdên Bakur de xwedî cihek taybet bû.

Di vê serwîsa BBC de 19 kes dixebitîn û bi vê gavê re 5 kes dê ji karê xwe bibin.

Ji sala 1997'an ve midûriya Beşa Tirkî ya BBC Huseyin Şukan dikir. Şukan wisa dibêje: "Di roja me de gelek platformên çapemeniyê hene ku li ser înternet, çapemeniya civakî û cîhazên mobîl kar dikin. Em jî, emê weşana xwe ya televîzyon û înternetê bidomînin. Lê ez ne bawer im ji van yek jî bikare valahiya radyoyê dagire."

'Gelek rojnameger li vir gihîştin'

Şukan van lê zêde dike. "Ji bo weşanger û nûçegîhanek radyo rêya xwe bi lez gihanidna girseyê ye; ji bo xwe pêş bixe wekî dibistanek e; ji bo afirîneriya xwe nîşan bide qadeke guncan e. Demekê li Tirkiyeyê, ji bo guhdar xwe bigihînin nûçeyên sansurkirî radyoya BBC Tirkî tekane çavkanî bû. Gelek rojnamegerên naskirî ji BBC Tirkî de xebitîne. Radyoya me ku xwedî dîrokeke wisa dewlemend e, birîna dengê wê girtina serdemekê ye."

BBC Tirkî li navenda wê Londonê, li Bush House (li vir, ji 30 welatan zêdetir ji gelan mirov hebûn) weşan dikir. Di salên dawî, di saet 18.00'an de 15 deqe weşan dikir û di vê 15 deqîqeyan de nûçeyên siyaset, civak, huner û çandê pêşkêş dikir. Radyoyê serê sibê di saet 07.00'an de û dawiya hefteyê jî bi 30 deqîqe bernameya nûçeyên xwe digihand guhdaran.

Li ser BBC hin agahî:

- BBC, wekî British Broadcasting Company, Ltd. yekem car di sala 1922'yan de hat avakirin.
- Şîrket, di sala 1925'an de hat tasfiyekirin, di sala 1927'an de wekî saziyeke raya giştî bi navê British Broadcasting Corporation (BBC) dîsa dest bi weşanê kir. Radyo digel ku li hemberî parlemenê berpirs e jî weşana xwe bi awayekî serbixwe dike.
- Beşa dinyayê ya BBC di sala 1932'yan de hat avakirin.
- Qraliyeta Yekbûyî rêveberiya BBC peywirdar dike.
- BBC di sala 1932'yan de dest bi weşana televîzyonê kir.
- Radyoya Beşa Tirkî ya BBC di 20'ê sermaweza  1939'an de dest bi weşanê kir.
- Heta niha BBC bi 32 zimanên dinyayê weşan dikir.
- Li 50 navendên  dinyayê li dor 250 nûçegîhanî ji wê re nûçe pêşkêş dikir.
- Hikumeta Îngilistanê pereyên ku bi bacê berhev dike pareke ji bo BBC vediqetîne: Salane li dor 3,5 mîlyar £ (nêzî 9 mîlyar TL'yê)
- BBC bi giştî 8 kanalen TV û 9 radyoyê pêşkêş dike.
- BBC reklamê nagire.

Weşana dawî ya Radyoya BBC Tirkî: