Diyarname

Asayîşa Rojava ji ARTA FM xwest weşana bernameyên xwe rawestîne. Ji bo çi? Vane dîtinên rêveberên ARTA FM û Asayîşa Rojava.

Roja 18'ê mehê endamên Asayîşa Rojava çûn navenda radyoya ARTA FM û ji karmendan xwestin ji ciyê kar derkevin û weşana bernameyan rawestînin. Asayîşê got tenê hûn dikarin stranan biweşînin, lê nikarin bernameyan çêbikin.

Me li ser vê yekê xwe gihand berpisê ARTA FM Sîrwan Hecî Berko. Berko li ser girtina ARTA FM dibêje ku heta niha sedemeke zelal nehatiye eşkerekirin lê dibêjin, "Di nav avahiya me de radyoyeke ne yasayî heye, ev ne rast e."

Berko wisa dibêje: "Me li ciyê radyoyê alavên weşanê yên radyoya MICT a elmanî daniye. Me cî bi kirê daye wan. Vê radyoyê destûra weşanê ji Yekîtiya Ragihandinya Azad stendiye. ARTA jî destûr ji heman saziyê stendiye. Em ne berpirsê weşana MICT ne. Tenê me cî daye wan û hayê me jê heye ku radyo kar bike. Naverok ji Berlînê di rêya NileSatê re tê û em wê diweşînin."

Pêla MICT 103,5* e, ya ARTA 99,5. Berko dibêje her tişt qanûniye û wiha didomîne: "Karek ne baş e ku hêzên ewlekariyê destên xwe bixin nav karên ragihandinê. Dadgeh hene, mirov dikare hesab bi kesan re bibîne, ku tawan hebe. Lê dema tawan nebe û tu nizanibî tawana te çi ye, ev pirsgirêk e." Jixwe Asayîş jî dibêje ku ew dê meseleyê ragihînin dadgehê û dê li wê derê mesele zelal bibe.

Li gor gotina Berko di ARTA ku bi kurdî, erebî û suryanî, di navbera satenê 14 û 20.00'an de weşan dikir de 50 kesî kar dikir ku sedî 35 jê jin bûn.

Berko herî dawî wisa got: "Tiştê ku bû qet ne baş bû. Hêviya me ew e careke din dubare nebe û ARTA zû weşana xwe bidomîne. Me vê sibehê biryar da em weşanê ji bo demeke ne diyar rawestînin ta ku Asayîş bihêlin ku em dîsa weşana xwe bikin. ARTA ne radyoya ji bo mûzîkê ye."

Asayîş: Wê dadgeh li gor qanûnan biryarê bide

Li ser rawestandina weşana ARTA FM, Asayîşa Rojava jî bi daxuyaniyeke nivîskî wisa got: 

"Li ser daxwaza aliyên têkildar 'Dezgeha fermî ya desthilatdariya giştî' ya ku ji Birêveberiya Asayîşên Amûdê re hatibû şandin, Asayişên Amûdê bi erkên xwe yên lêgerînê rabûn.

Di lêgerîn û kontrolkirina avahiya ku radyoya ARTA FM hat xuyakirin ku radyoyeke din bi navê 'MICT' di heman avahiyê de bi awayekî korsan û illegal weşana xwe dike. Di encama lêkolînan û lêpirsînên bi karker û birêveberên radyoyê re diyar bû ku radyoya MICT ku li Amûdê û derûdora wê weşanê dike radyoyeke bê destûr ji 'Dezgeha Ragihandina Azad' werbigre û bi awayekî ne qanûnî weşanê dike û tu belgeyên qanûnî û fermî di dest birêveberên wê de tune ne. Her wisa birêveberên radyoya ARTA'yê ji vê kirina ne qanûnî agahdar bûn û bi alîkariya wan ev kar dibû."

Asayîş dibêje ji bo berdewamkirina karûbarê lêpirsînê, dê ji roja sêşemê 18.02.2014 ve û li gor rêbazên qanûnî, dê weşana bernameyên radyoya ARTA'yê bo sê rojan bê rawestandin û wê tenê stiran û muzîk bêne weşandin û wisa dibêje: "Piştî temamkirina karûbarê lêpirsîn û lêkolînana, wê doz ji bo dadgehê bê pêşkêşkirin û li gor rêbazên qanûnî bi encam bibe."

Di encamê de tiştê bê gotin, gotina dawî dê dadgeh bibêje. Piştî vê yekê ARTA FM dê bikaribe careke din weşana xwe bike yan na jî dê zelal bibe.

*Wekî têbinî: Li gor agahiyên ku ji Rojava ji bo me hatin, tê gotin ku MICT FM bi erebî weşan dikir, xeta wê ya weşanê nêzî îslamiyê û opozîsyonê bû.