Diyarname
Helbestvan Berken Bereh bi Hemû Berhemê li cîhana helbestê ya kurdî ye. Berhema nivîskarê malpera me Bereh a bi navê "Dilê Min Palgeh e ji Işqê re" ku hemû helbestên wî têde cih digirin ji Weşanên Lîs derket. Di vê berhemê de hemû pirtûkên Bereh ên ku berê derketine û pêre jî bi qasî pirtûkek zêdetir helbestên wî yên nû ku yekem car di vê berhemê de derdikevin pêşberî xwendevanan jî hene.

Helbestvan Berken Bereh di çaryeka dawî ya sedsala çûyî de bûye yek ji wan kesên ku pirên helbestî ava kirine. Bereh jî bi helbesta xwe ve di navbera rabirdûya kurdan ya nêzîk a wêjeyî de, di navbera nifşê Tîrêjê û nifşê Rewşenê yê salên 90’î de pirek ava kiriye. Bereh ku heta niha çend pirtûkên xwe yên helbestan pêşkêşî cîhana helbesta kurdî kiribû, niha bi Hemû Berhemên xwe ku navê "Dilê Min Palgeh e Ji Işqê Re" lê kirine derket pêşberî xwendevanên helbestê yên kurdî.

Berken Bereh helbestvanekî kurd e, yê ku di riya peydakirina kilamên nû yên civaka xwe de, ji aliyê lêgerîn, vekolîn, kefteleft û jixwexwînberdanê de tu timatî nekiriye. Bereh bi aramî, bi teqleke mişt bi bizava zimanê Kurdî, doza peydakirina bedewiya zimanê kurdî, bilaşûgewdekirina wê û parastina wê dike. Bereh, ji ber birek helbestên xwe, timî silavê dide nifşê piştî xwe û hema ji ber haikuyên xwe yên delal, li ser riya helbestê tu tirs û şayîşa wî tune ye di mijara xweguherandin û veguherandinê de.

Xwendevanên kurd ên helbesthez dê bi riya Dilê Min Palgeh e Ji Işqê Re, Hemû Berhema Berken Bereh ve bi her awayî helbestkarekî bervekirî yê ku dildarê civaka xwe ye bibînin û bixwînin.

Weşanxaneya Lîsê magnum opus, ango hêjatirîn berhema helbestkar Berken Bereh, Dilê Min Palgeh e Ji Işqê Re, Hemû Berhem bi şanazî pêşkêşî wêjeya Kurdî û helbesthezên Kurd kir.

Her wiha kesên bixwazin berhemê bi dest bixin dikarin li Fûara Pirtûkan a Amedê ku niha li dar e ji standa Lîsê peyda bikin.

Dilê Min Palgeh e Ji Işqê Re, Hemû Berhem / Berken Bereh / Helbest / 432 rûpel, Gulan 2011 / Weşanxaneya Lîs