Diyarname
Di "!F İstanbul"ê de nîşandayîna fîlmên kurdan didome. Fîlmê "Çiyayê Qendîlê" û "Zarê" rastî eleqeyeke mezin hatin.

Di çarçoveya Festîvala Fîlmên Serbixwe "!F İstanbul"ê de 19'ê mehê fîlmên bi navê "Zarê" hat nîşandayîn. Fîlmê ku di sala 1926'an de li Ermenistanê, li gundekî kurdên êzîdî de hatiye kişandin derhêneriya wî Hamo Beknazarian ê ermen kiriye. Ermenistan piştî "Namûs"ê, "Zarê" wekî duyemîn fîlmên Ermenistanê ku hatiye kişandin dihesibîne. Ji ber senaryo li ser kurdan e, piraniya lîstikvanan kurd in û li gundekî kurdar hatiye kişandin kurd jî vî fîlmî wekî yekemîn fîlmê kurdan dihesibînin. Û fîlm yekemîn car li Tirkiyeyê, li Stenbolê di çarçoveya festîvalê de hat nîşandayîn. Salona ku ji bo temaşevanan tije bûbû, gelek kes jî bêyî bilêtê peyda bikin û li fîlm temaşe bikin vegeriyan. Fîlmê bêdeng ê li ser çîroka evîna keçeke kurd Zarê û Silo bi dengê çenga (arp) Tara Caf rengek xweş girt. Caf di dema nîşandayîna fîlm de bi awayekî zindî li çengê da û coşek mezin da temaşevanan.

Her wiha fîlmê "Çiyayê Qendîlê" yê derhêner Taha Kerîmî li wê sêgoşeya ku sê welatan sînor lê kişandiye dîmenên xweş û mijara trajîk pêşkêş kir. Temaşevan ji bo vî fîlmî jî ketibûn rêzê û salona sînemayê mişt tije kiribûn.

Di festîvalê de nîşandayîna fîlmên kurdan didome û ev eleqeya kurdan jî organîzatoran dilşad dike; rê li ber fîlmên din ên kurdan vedike.

 **

Ji bo nûçeyên eleqedar û roja nîşandayîna fîlmên kurdan binêrin:

- 'Kurte'yên kurdan di '!F İstanbul'ê de

- Di "!F İstanbul"ê de fîlmên kurdan