HEWLÊR

Partiyên siyasî yên Başûr bi daxuyaniyeke hevpar êrîşên çeteyan yên li hember Rojava pêktên şermezar kirin. Partiyên siyasî yên Başûr dan zanîn ku eger Hikûmeta Herêma Federal a Başûrê Kurdistanê heta piştî cejna Remezanê pêngavên pratik neavêje, ewê dest bi çalakiyên cuda bikin.

Bi armanca piştgirî dayîna berxwedana Rojava li Hewlêrê partiyên siyasî li navenda avahiya Hizba Şûî a Kurdistan daxuyanî dan çapemeniyê. Partî û aliyên siyasî yên piştgirî dan Rojava ev in; PDK, YNK, Yekgirtûya Îslamiya Kurdistan, Komela Îslamiya Kurdistan, Hizba Zehmetkêşên Kurdistan, Partiya Ayendeya Kurdistan, Hizba Demokrata Beyt Nehrîn, Partiya Karker û Rêncberên Kurdistan, Bizûtneweye Demokrata Kurdistan, Bizûtneweya Demokrata Gelê Kurdistan, Hizba Rizgariya Kurdistan û Komeleya Rewşenbîrên Turkmen ya Herêma Kurdistanê.

JI BO HIKUMETÊ; HELWESTA XWE DIYAR BIKE

Di daxuyaniya hevpar ya partiyên siyasî yên Başûr de berxwedana gelê Rojava û Yekîneyên Parastina Gel (YPG) hatin silav kirin. Ji bo xwedî derketina şoreşa Rojava bang li hemû kurd û aliyên aştîxwaz hate kirin û got bêdeng nemînin. Her wisa êrîşên komên çete yên li hemberî gelê Rojava pêk tên, hatin şermezarkirin. Partiyên siyasî yên Herêma Federal a Başûrê Kurdistanê bang li Hikumeta Herêmê kir  ku, eger heta piştî Cejna Remezanê helwesta xwe ya ji bo Rojava eşkere neke û ji bo alîkariya Rojava gav neavêje, ew ê dest bi çalakiyên cuda bikin. Bang li hemû aliyên siyasî yên li Başûr hat kirin ku piştgiriyê bidin berxwedana gelê Rojava.

Di daxuyaniyê de rojnamegerekî derbarê vekirina deriyê Sêmalka pirsek pirsî, berpirsê Liqa 2 (Hewlêr) yê PDK’ê Dr. Aras Xoşnaw wiha bersiv da: "Wekî her welatek yê cîhanê sinorên me jî girtî ne, her kesek nikare bi serê xwe û bê kontrol di sînorê Rojava de derbasî Herêma Kurdistanê bibe. Wekî hûn hemû jî dibînin, li Iraqê tenê di meha tîrmehê de hezar kesan zêdetir jiyana xwe ji dest da. Niha di vê aloziya Sûriyeyê de destên gelek aliyên neyar hene û dibe ku bixwazin li Rojava aloziyên xwe derbasî Herêma Kurdistanê bikin. Ji bo vê em neçarin ewlekariya gelê xwe jî bihizirîn. Lê bila hemû kes bizanibe deriyê Sêmalka ji bo alikariya mirovî û hatin û çûyîna asayî vekiriye.”

‘ME HER TIM PIŞTGIRÎ DA BERXWEDANA ROJAVA’

Li ser pirsa rojnamegeran ya ji bo ciwanên ku bi nave cîhadê li Başûr diçin Rojava, berpirsê Komeleya Îslamiya Kurdistan ya Hewlêrê bersiv da û wiha axivî: "Divê rojnamevanên Kurd di van mijaran de pir şiyar bin. Wek partiyên îslamî bi taybet wek Komeleya Îslamî ji destpêkê heta niha me her tim piştgirî da berxwedana Rojavayê Kurdistanê. Me êrîşên komên çete yên li ser gelê sivîl yê Rojava her tim bi tundî şermezar kiriye. Lê hinek alî li ser navê cîhadê çûyîna ciwanên Herêma Kurdistanê dixin stûyê partiyên îslamî yên herêmê. Hinek li ser navê me malperên înternetê vedikin û tiştên ne li gorî siyaset û sekna me diweşînin. Lewma em di vê mijarê de tên sûcdarkirin.”

Ji ANF'ê hatiye girtin