Enqere
Balyozê Afrîkaya Başûr ê Enqereyê Tebogo Seokolo çû serdana Navenda Giştî ya Partiya Aştî û Demokrasî (BDP). Di serdanê de Hevserokê BDP’ê Selahattîn Demîrtaş Seokolo û Nelson Mandella vexwend Newroza Amedê. Demîrtaş diyar kir ku haya wan jê heye rewşa tenduristiya Mandella ne baş e û got: “Herî hindik ji bo Newroza Amedê em li benda peyama birêz Mandella ne.”
Der barê hevdîtinê de Demîrtaş agahî da û diyar kir ku Balyozê birêz ji bo ew hev nas bikin serdana partiya wan kiriye û wiha domand: “Balyaz Seokolo, xwestiye ji bo der heqê partiya me û pirsgirêka kurd de agahiyan bigire. Me jî hem rabirdûya pirsgirêka kurd û hem jî pêşniyarên çareseriya pirsgirêkê yên partiya me ji bo birêz Seokolo anîn ziman.”
Demîrtaş da zanîn ku di hevdîtinê de wan bi taybetî pirsgirêka kurd û ezmûna Afrîkaya Başûr dane ber hev û der barê hevdîtinê de agahî da: “Balyozê Birêz Seokolo diyar kir ku qonaxa gelê kurd pir dişibe ezmûna gelê Afrîkaya Başûr. Her wiha me her du aliyan bal kişand ser pêvajoya ku Nelson Mandella têre derbas bûye û pêvajoya birêz Ocalan têde ye.”
Demîrtaş got ku wî Seokolo û Nelson Mandella vexwendine Newroza Amedê û ev yek lê zêde kir: “Em dizanin ku rewşa tenduristiya birêz Mandella ne baş e. Me hêviyên xwe yên şîfa û xweşiyê ji bo Mandella anîn ziman. Me daxwaz û hêvî kir ku herî hindik peyama Birêz Nelson Mandella bigêhîje Newroza Amedê. Wî jî li Tirkiyeyê ji bo çareseriya pirsgirêka kurd, niyetên xwe yên baş anîn ziman û got ku di vê qonaxê de muzakere gelek girîng in. Her wiha Birêz Seokolo da zanîn ku pêvajoyeke bi heman rengî di sala 1994’an de li welatê xwe jiyane û bi gotûbêj û muzakereyan mesele çareser kirine, lewre di vê qonaxa ku pirsgirêka kurd gihîştiye de gotûbêj û danûstandin, ji bo çareseriyê pir girîng e, hêviya wan ew e ku mesele bi diyalog û muzakereyan bê çareserkirin."