AMED
Hevserokê BDP'ê Selahattîn Demîrtaş li Amedê axivî: "Ev 30-40 sal in em dereng mane jiyana duzimaniyê bidin destpêkirin. Ji ber wê jî em ji gelê kurd lêborînê dixwazin."

Rêxistina BDP'ê ya Amedê, malbatên Çelîk, Sayar û Yaşar, ku ev 46 sal in dijminê hev in bi xwarineke aştiyane ew li hev anîn. Xwarin li Tesîsên Demirokê hatiye dayîn, bi beşdariya Hevserokê BDP'ê Selehattîn Demîrtaş, Cîgirê Şaredarê Kayapinarê Mahmut Dag, Serokê DÎAY-DER'ê Zahîd Çîftkuran, Serokê Şaxa MAZLUM-DER'ê ya Amedê Selahattîn Çoban, Serokê Rêxistina BDP'ê ya Amedê Nijad Yaruk, rêveberên ÎHD, TUHAD-DER, SES, KESK û gelek kesên ji malbatên pêk hat.

Nêzî 2 hezar kesî beşdarî merasima xwarina aştiyê bûn û mewlûd hate xwendin. Piştî axaftinan Hevserokê BDP'ê Demirtaş destê endamên malbatan girt û merasim bi xwarinê dawî bû.

Hevserokê BDP'ê Selahattîn Demîrtaş, berî merasîmê der barê gotinên, "Kesên ku di referandûmê de biryara boykotê dane di hilbijartinan de dê nikaribin deng bidin" de wiha got: "Tiştek wiha tune ye. Ev derew in. Bi taybetî dixwazin hilbijêran bitirsînin."
Demîrtaş li ser "Jiyana duzimaniyê" jî nirxand kir û wiha got: "Rayedarên dewletê hin rastiyan nabînin. Li vir ji xwe duziman hene. Em tiştekî ku tune ji nû ve naynin rojevê. Em hewl didin ev rastî bên dîtin. Em hewl didin qedexeyên li ser kurdî bişkînin. Hemû xebatên şaredariyên me yên têkildarî zimanê dayikê rewa ne û li gorî hiqûqê ne. Mesela zimanê zikmakî ji bo me ya herî girîng e. Zimanê Tirkiyeyê yê fermî ji xwe tirkî ye. Em tiştek ji vê re nabêjin. Lê divê li heremê astengiyên li pêşiya duzimaniyê bên rakirin. Lazim e li hemû deverên welat jî wiha be. Zimanê me yê ragihandinê yê hevpar tirkî ye. Lê kurd heqeretên li hemberî zimanê xwe tu carî qebûl nakin. Bila vê yekê her kes baş bizanibe.

Demîrtaş, têkildarî gotinên Serokomarê Iraqê Celal Telebanî yên wekî "Ji bo daxwaza duzimaniyê hê zû ye" ku di rojnameyan de cih girtibû wiha got: "Belê bêwext bûye. Ev 30-40 sal in em dereng mane jiyana duzimaniyê bidin destpêkirin. Ji ber vê jî em ji gelê kurd lêborînê dixwazin."

Demîrtaş, gotinên têkildarî xweseriyê ya Serokê Odeya Bazirganî û Pişeyê ya Amedê Galîp Ensarîoglu ku gotibû ‘Xweserî ne daxwaza hemû kurdan e’ jî ev tişt anî ziman: "Ev nêrîna wan e. Lê bila berdin nûnerên kurdan li ser navê kurdan biaxivin. Dibe ku ev ne daxwaza wan be. Em rêzê jê re digirin. Em nabêjin 'Ev daxwaza hemû kurdan e'. Lê bila yên din jî nebêjin 'Tu kurd vê naxwaze'. Êdî gelê kurd û tirk jî baş dizane ku xweseriya demokratîk projeya felatiyê û rizgariyê ya herî baş e."