SÊRT
Şaredariya Dihê ya Sêrtê, ji bo 2'yemîn Festîvala Çand û Hunerê ya Xwezaya Dihê-Çiravê serî li qeymeqamiyê da. Festîval îsal bi dirûşmeya, "Bi hemû hênikahiya Çiravê em Xweseriya Demokratîk silav dikin" di navbera 14 û 15'ê gelawêjê de, dê li dar bikeve.

Li gor agahiyên komîteya amadekar dê gelek hunermend beşdarî festîvalê bibin. Şaredarê Dihê Melîh Oktay li ser xebatên festîvalê wisa got: "Me par yekemîn festîval li Dihê li darxist. Îsal jî, di civîna meclisê ya di nava meha borî de hate li darxistin me biryara li darxistina 2'yemîn Festîvala Çand û Hunerê ya Xwezaya Dihê-Çiravê girt."
Oktayi, destnîşan kir ku xebatên mîhrîcanê dane destpêkirin û piştî bersiva fermî ya bê dayîn dê bernameya mîhrîcanê ji çapameniyê re ragihînin.

Oktay diyar kir ku wê hevserokên BDP'ê, parlementer û şaredar jî beşdarî festîvala îsal bibin.

Şaredar Oktay di dawiyê de bang li gel kir ku beşdarî festîvalê bibe.