Diyarname
Kovara Nûbiharê ku ev 17 sal in weşana xwe didomîne niha bi hejmareke nû derket pêşberî xwendevanên xwe.

Nûbihar ku sê mehan carekê derdikeve niha hejmara xwe ya 111’an derxist.
Di kovarê de gerînendeyê kovarê Suleyman Çevik bi nivîsa xwe ya bi navê “Di meha Gulanê de Nûbihar” çalakiyên ku di wê mehê de ji aliyê Nûbiharê ve hatine kirin vedibêje û encamên ku ji wan çalakiyan derketine dinirxîne.

Di kovarê de Ehmed Akin bi derhênerê “Min Dît” Miraz Bêzar re hevpeyvîneke kiriye.
Remezan Pertev jî nivîseke bi sernavê “Testên jîrayî û exlaqê pîşeyiyê” nivîsandiye û têde pedagojiya zarokan dide nîqaşkirin. Ew, di analîza xwe de balê dikşîne ser neehlbûna wezîfedarên komarê yên di vê qadê de û encamên ku zarokên kurd pêrgî dibin vedibêje.

Her wiha Abdulkadir Got jî bi sernavê “Bi esmannasiyê eşq û evîna Melayê Cizîrî ya tesewwifî” de nivîseke amade kiriye. Yek ji nivîsa li ser Melayê Cizîrî jî ya Bamed Serdar e ku bi sernavê “Hermenotîk, xebatên li ser Melayê Cizîrî û bersivek” hatiye weşandin. Di vê nivîsê de jî li ser têgeha ‘Hermenotîk’ê hatiye sekinîn û têkiliya hermenotîkê ya bi xebatên li ser Melayê Cizîrî têne kirin hatiye îzahkirin.

Yek ji nivîsên kovarê ke durdikeve pêş jî ya Sînan Hakan e ku bi sernavê “Ji Wida heta Mela Muhemmed Gulnarê Miksî, pêwendiya helbestvan û mîrên Miksê” hatiye pêşkêşkirin.
 
Her wiha kesên wekî Mûrad Celalî, Ednan Ferat Bayar, Yavuz Delal, Bahaeddîn Cibilgiravî, Abbulbakî Denîz, M. Nezîr Basneyî, Mihemed Jiyan, Huseyn Şemrexî, Ahmet Gemi, Kamran Simo Hedilî, Bavê Xecê, Hatîce Mollakendî, Hesen Polat û Celal Al Ehmed, Felat Dilgeş, Perwîz Cîhanî, Mewlana Celaleddînê Rûmî, Rojen Barnas, Şêx Galib, Cankurd, M. Emin Bozarslan, Janda Serfiraz, Mela Mehmûdê Qultikî, Îskenderê Belwanî, W. K. Merdimîn, Sidîq Gorîcan, Hasan Huseyin Çevik, Marîn, Dilazad ART, Şêx Mehmûdê Hefîd, Kenanê Nado, Raîfê Bêçare, Sîpanî, Bargiran Şanaz, Seyda Ronahî, Mesud Serfiraz, Mehmed Emîn Axwelat, M. Zahir Ertekin û Seydayê Cirnê Reş bi helbest, çîrok û ceribandinên xwe di kovarê de cih girtine.

Ji bo têkiliyê:
Tel: 0212 519 00 09
nubihar@gmail.com

***