Diyarname
Kovara W hejmara xwe ya nû derxist. Kovarê ev hejmara xwe ji bo nivîsên ji girtîgehan ji bo wê hatine şandin veqetand.

Di sala 1997-98'an de kovara Jiyana Rewşenê du caran ji nivîsên girtîgehan hejmara taybet a ji nivîsên girtîgehan derxistibû. Niha kovara W jî rêbazeke wisa bikar anî û ji nivîsên ku ji girtîgehê jêre hatin şandin hejmareke taybet derxist.

Edîtoriya kovarê di nivîsa edîtor a hejmara taybet de wisa gotiye: "Me xwest em bi vê hejmarê, dengê dostên xwe yên serhildêr, hevalên xwe yên ku milê bindestiyê badidin, dengê hogirên mekanhej û zemanhej, dengê rêhevalên ku wan şeva bindestiyê wergerandin û şev kirin berbanga azadiyê û pêşkêşî me kirin, bigihînin we. Ev dengên ku xwe bê ronî li rûyê mirovan dixin, di tênetiya hucreyan de welidîne, dîwarên ker şîr dane wan, ranzeyên hesinî ew nivandine û biharên delodîn ew kamil kirine. Ev dengên ku hûn ê bibihîzin ji sindoqa gelekî ku bengiyê azadiyê ne. Van dengan ji bîr nekin! Dengê qasidên aştiyê jî ji bîr nekin!"

Di kovarê de keda kesên wekî Tewfîq HÊJA, Feratê DENGIZÎ, Wezîr KAYAR, A. Hekîm QOZLÛX, Ahmet BÎLGE, Kemal DEMÎRBAŞ, Bîlal ONEN, Evdê Koçer CANO, Naîf BAL, Qedrî ALKOÇ, Mahmût ABA, Kerem OZTURK, Îlhan Samî ÇOMAK, Zekî KAYAR, Mehmet BOŞATLIOGLÛ, Kenan KARAASLAN, Osman KAPAN, Huseyîn GUÇLU, Rojhat ŞAXÎ, Ercan DOGAN, Fîkret KARAKOÇ, Metîn YAMALAK, Mistefa TÛNCYUZLU, Soydan AKAY, Sebahattîn SUMELÎ, Fadil AYDEMÎR, Bahrî SALGIN, Enwer EHMED, Nedîm YILMAZ, Veysel ÎLHAN, Ahmet TAMÎR, Sînan SUTPAK, A. Selam BARAN, Mistefa TÛNCYUZLU çêbûye.

Her wiha kovarê diyar kiriye ku dê dosyaya xwe ya hejmara bê li ser helbestkar, nivîskar, wergêr û edîtor Kawa NEMIR amade bike û kesên bixwazin di vî warî de tişteke binivîsin dikarin heta  15’ê gelawêja 2010’an bigihînin ber destê edîtorên kovarê.

***