Diyarname
Festîvala Mîstîk bi konsera hunermenda navdar Yasmin Levy û Koroya Lusavoriç a Ermen bi dawî bû. Konser rastî eleqeyeke gelek mezin hat.
2'yemîn Festîvala Mîstîk a Stenbolê ku 20'ê mehê dest pê kiribû êvara 25'ê mehê bi konsereke bi coş bi dawî bû. Konsera ku nêzî du hezar kesî hat û ji ber cih nîn bû gelek kes li derve ma bi coş li dar ket.
Di atmosfera dîrokî û bandorker a Dêra Aya Îrînî de pêşî Koroya Lusavoriç a Ermen derket ser dikê û bi yek dengî stranên bi ermenkî û tirkî pêşkêşî temaşevanan kir.
Dûre hunermenda konsera Yasmin Levy ku bi heyecaneke mezin temaşevan li bendê bûn dest pê kir.
Yasmin Levy a ku li ber destê bavê xew hînê muzîka Latin û Sefarad bûye, di muzîka xwe de zelaliya ladîno (muzîka cihû û spanyol) û muzîka flamenkoyê, digel dengê gîtaran pêşkêş dike.
Yasmin Levy ku bi dengê xwe yê zelal stranên slow û yên reqsê pêşkêş kirin coşeke mezin da temaşevanan. Wê bi tirkî sipasiya temaşevanan kir. Di konsera ku gelek caran dest bi axaftinê dikir, qala çîrokan dikir û bi vî awayî têkilî bi temaşevanan re datanî de got; "Ez li vê derê xwe wekî li mala xwe hîs dikim."
Yasmin Yevy di konsera xwe ya 2 saetî de, li ser çepikên temaşevanan careke din vegeriya konserê û sê stranên din pêşkêş kir.
Levy ku bi strana xwe "Me Voy" dawî li konsera xwe anî wisa got; "Min berê li ciheke wisa xweşik konsereke nedabû û ez derneketibûm pêşberî qelebalixeke wisa."
Di 2'yemîn Festîvala Mîstîk a Stenbolê de, roja yekem kemanjenê navdar Farid Ferjad bi kemanê xwe coş dabû temaşevanan. Dûre koma Budist ji Perestgeha Chionin rîtuelên budîst pêşkêş kiribûn. Piştî komê jî Kardeş Turkuler stranên mîstîk û îlahî yên ji Anatolî, Trakya û Mezopotamya, bi kurdî, tirkî, erebî, suryanî pêşkêş kiribûn.
Dengê sûfîzm û eşqê Nassima Chabane bi kincên gelerî deng li temaşevanan kir di çarçoveya festîvalê de.
Her wiha pêşangeha fotografan a Rozita Kandiyoti û Aleksi Petridi ya bi navê "Biriqîna Mîstîk" li dar ketibû, fîlmên mîstik hatin nîşandayîn û lîstika Necip Fazil Kisakurek a bi navê "Îbrahîm Ethem" jî ji aliyê Lîstikvanên Şanoya Erguvan ve hatibû lîstin.
Festîvala Mîstîk ku par eleqe dîtibûn îsal jî ev eleqeya xwe domand û ji bo saleke din xatir xwest.
Foto: Cemil Oguz