Ferît Demîrel

Ez ê di vê nivîsê de bi mînaka nûçeyekê behsa rewşa medyaya kurdî/kurdan bikim.

Berî niha bi mehekê @pervin_chakar li ser hesabê xwe yê twitterê tweetek weşand. Çakar bi kurtasî digot, wê, operayek li ser kurdan hatiye çêkirin bi dest xistiye. Navê wê jî "Şeva Kurdan" e. Li ser vê tweetê, min ji Pervin Çakarê re nivîsand û min jê xwest ku wê karibe pirsên min ên derbarê operayê de bibersivîne. Xanimê daxwaza min qebûl kir, min jî tiştên meraq dikir wekî pirs jê re şand. Piştî ku bersivên wê hat, min wekî nûçe bi kurdî û tirkî li ser bianetê weşand.

Paşê hin dezgehên din ên medyayê ew nûçe ji bianetê girt û weşandin. Ji van, televîzyonan Medyahaberê vîdeoyek amade kiribû û teksta ku min nivîsandibû, bêyî tîpekê jî biguherîne bi deng xwendibû û wekî vîdeo-nûçe belav kiribû. Lê bêyî ku çavkaniyê nîşan bide. Li ser vê, min li ser twitterê ji berpirseke wan re mesajeke taybet nivîsand. Hincetên xwe nîşan da lê got em ê sererast bikin. Heta du sê roj borîn jî, bi qasî ku min şopand nehatibû sererastkirin. 

Paşê rojnameya Yeni Yaşamê di rûpelên xwe de ew nûçe weşand. Rojnameyê bianet wekî çavkanî nîşan dabû lê navê min nexistibûn nûçeyê. Piştî wê bi rojekê jî li ser malperê heman nûçe belak kirin. Li ser tweeteke min bal kişand ser vê rewşê. Berpirsan navê min li nûçeya ku di malpera xwe de belav kiribûn, zêde kirin.

Di ser weşandina nûçeyê re nêzîkî mehek e ku derbas bûye. 

Duh (8.02.2019) e-kovara Popkurd hate weşandin. Hejmara wê ya çarê ye. Min li naverokê nêrî. Min dît ku di beşa Pop Nûçe de bi du hevokan behsa Operaya Şeva Kurdan kirine. Min pêşiyê got ku dibe zanyarî ji Pervîn Çakarê stendibin. Paşê dema min hevok xwendin, min ferq kir ku, hevokên min in. Ji xwe pêşniyara sernavê Operaya Winda jî ji hevkarê min Murat Bayram hatibû. Popkurdê ew têgeh jî xistibû nava hevokê. Wêneyê nûçeyê jî yê me ye. Lê "edîtorên" kovarê ne behsa bianetê ne jî behsa min kiribûn. Dibe ku hin ji we bibêjin, du hevok in, hewceyî nîşandana çavkaniyê dike? Bersiv erê ye. Hem ji hêla exlaqê rojnamegeriyê hem jî ji hêla rêzgirtina ji kedê re, bersiv erê ye. Heke ev neyê kirin, navê vê di nava civakê jî, di nav hiqûqê de jî dizî ye. Li ser vê, min pêşî tweeteke îronîk avêt û got; "Kesê/a ku beşa Pop Nûçeyê amade kiriye kî be ez wî/ê pîroz dikim. Ne ji wî/ê bûya me yê çawa bizanî ba ku Pervîn Çakarê operaya li ser kurdan bi dest xistiye...." 

Min hêvî kir ku "edîtorên" kovarê fam bikin û bi çend hevokan be jî li ser twitterê bersivekê bidin min. Lê digel ku du saet borî jî tu bersiv nedan. Min tweeteke din bi van gotinan avêt: "Xuya ye kêfa edîtorên @popkurdkovar-ê ji vê kiryarê hatiye. De şabaş ji we û rewşa we re...."

Bersiv ji vê re jî nehat. Herî dawî min ev tişt nivîsand: "Ez li bendê bûm ku hûn xwe biparêzin lê xuya ye hûn rûşuştî ne! we dikarî bû bi çend gotinan ev mesele safî bikira. We nekir û qumaşê xwe diyar kir. ez ê di her fersendê de vê rewşa we bînim bîra we...."

Bi ser van peyaman re rojek derbas bû, digel ku di vê rojê de wan gelek twittên din weşandin, ne mimkûn e twittên min nedîtin jî bersiv nehat, diyar bû bersv nadin. Piştî vê rewşê min biryar da ku vê nivîsê binivîsim û rewşa van rûşûştiyan bi we re par ve bikim...

Ji bo "edîtorên" popkurdê; Heke we bi nezanî ev tişt kiribe yan dest ji vî karî berdin yan jî ji xwe re li ber destê pisporan vî karî hîn bibin. Hîna hûn di destpêka kar de ne. Ne dereng e. 

Na heke we bi zanebûn kiribe, wê gavê hûn hem diz in hem jî qurpiz in. Û ez ê her û her diziya we bînim bîra we û civata kurdan.

Tercîha we ye!!!!