Kenan Kirkaya

Mizgîniyên demên tengasiyê, nîşaneya firêqetî û rojên xweş in. Deklerasyona yekîtiya partiyên kurd di vê pêvajoya êrîş, ba û bahoza faşîzmê de ji bo gelê me mizgîniyeke bi vî rengî ye.

Sala 2019’an li gel hemû êrîş, alozî, qeyranan ji gelê kurd re mizgîniyên xêrê jî anîn. Ji sala 2015’an vir ve agir li ser serê gelê kurd dibarînin. Kurdan bi êş be jî bi berxwedanê 2019’an pêşwazî kir. Her çiqas di serî de Rojava hemû herêmên kurd di bin gefxwarinan de bin jî hêza gelê kurd hevsengiyên dinyayê dihejînin û diyar dikin. Li Rojava ba vegeriya û serdestiya psîkolojîk kete destê gelê kurd.

Dîsa di destpêka salê de ji bo tifaqa neteweyî ku xem û xeyalên gelê kurd a sedan salan e bi sedema hilbijartinan be jî gaveke dîrokî, erênî, hêvîdar hate avêtin. 7 partiyên kurd hatin cem hev û tifaqa hilbijartinê li dar xistin. Dil dixwest ku ev tifaq hîn berfirehtir bibûya û hemû derdorên kurd di vê tifaqa azadiyê de cih bigirtana. Lê belê ev gav bi serê xwe pir watedar û girîng e. Ev gav feraset û ezbera ‘kurd nabin yek, yekîtiya kurdan ne pêkan e, kurd ne li pey xeyalên mezin, li pey berjewendiyên biçûk diçin’ hildiweşîne. Ev gav hêviya Cegerxwînê nemir ku digot ‘Kurdno bibin yek’ pêk tîne.

Ji bo ku ev helwdan bigihîje encameke serkeftî divê gelek xebat bên meşandin. Hîn rêyeke dirêj li pêşiya gelê kurd heye. Divê ku her kurdek bi dilpakî û jidil piştgirî bide vê helwdanê. Divê herkesek ji bo vê yekê fedekariyê bike. Di vî war û barî de krîtera herî girîng berjewendî û azadiya gelê kurd e. Heya niha di vê rêyê de bi sedhezaran ewladên kurd xwe feda kirin. Niha tişta ji me tê xwestin ew e ku em hesabên koltixan nekin, feraseta ‘ezeziyê’ neparêzin.

Dîsa jî ji bo hêvîdarbûnê gelek sedem hene. Destpêk nîvê serkeftinê ye. Partiyên kurd peywira xwe bi cih anîn, niha dor dora civaka kurd e. Civaka kurd ji bo vê yekê amade ye. Di vî warî de feraset û dîtina civakê ji partiyan li pêştir e. Gel di her şert û mercê de rastî û şaşiyê ji hev cuda dike. Di demeke wiha ku kurd li qada navneteweyî tên axaftin, divê çarenûsa xwe diyar bikin. Li ser kurdan lîstikên mezin hene. Ji bo vê yekê jî yekîtiya ku di navbera partiyên kurd de hatiye lidarxistin bersiveke mezin e.

Dê gelê kurd bi vê sînerjiyê hem siberoja xwe diyar bike û hem jî îradeya xwe xurt bike. Cardin ev yekîtî û mizgîniya xêrê li hemû gelê kurd pîroz be.

09.01.2019, E-rojname