Stockholm
Heta niha diyar bû ku di hilbijartinên giştî yên Swêdê de 6 kurd wekî mebûs hatin hilbijartin. Ji van 4 jê ji Partiya Sosyal Demokrat, yek jê ji Partiya Lîberal û yek jî ji Partiya Demokratên Swêdê hatiye hilbijartin. Hê encamên fermî nehatine eşkerekirin lê diyar bûye ku ev kurd ji bo mebûsî hatin hilbijartin:
- Gulan Avcî, ji bakurê Kurdistanê ye, ji Partiya Lîberal, li bajarê Stockholmê hatiye hilbijartin.
- Kadir Kasirga, ji bakurê Kurdistanê ye, ji Partiya Sosyal Demokrat, li bajarê Stockholmê hatiye hilbijartin.
- Lawên Rêdar, bavê wê ji Başûr û diya wê ji rojhilatê Kurdistanê ye, ji Partiya Sosyal Demokrat, li bajarê Stockholmê hatiye hilbijartin.
- Serkan Kose, ji kurdên Anatoliya Navîn e, ji Partiya Sosyal Demokrat, li bajarê Stockholmê hatiye hilbijartin.
- Roza Guçlu Hedin, ji bakurê Kurdistanê ye, ji Partiya Sosyal Demokrat hatiye hilbijartin.
- Sara Sêpele, bavê wê kurdê ji Anatoliya Navîn û diya wê swêdî le, ji Partiya Demokratên Swêdê hatiye hilbijartin. Ew ji niştecihên Kramfoşê ye.
Li Swêdê 9'ê mehê hilbijartina giştî û hilbijartina şaredariyan li dar ket. Di nav berendaman de 40 kurd wekî berendam hebûn.
Encama ne fermî
Li gor encamên ne fermî "Bloka Çep" ku ji Sosyal Demokrat (101 kursî), Partiya Keskan (15 kursî) û Partiya Çep (28 kursî) pêk dihat bi sedî 40,7 yekemîn e. Vê bilokê 144 kursî bi dest xistine. Îtîfaka Nav-Navend ku ji Demokratên Xiristiyan û Lîberalan pêk tê bi sedî 40,3 bûye duyem û 143 kursî bi dest xistine. Li Swêdê beşdarî sedî 84.4 çêbû. Encama fermî dawiya vê hefteyê dê bê eşkerekirin.