Amed
Şaredarê Bajarê Mezin ê Amedê bang li xwediyê erebeyan kir ku plakaya 21'ê bidin tescîlkirin.
Li gor daneyên Saziya Îstatîstîkan a Tirkieyê (TUÎK) li Amedê 211 hezar û 847 kes xwedî bawernameya ajokariyê ne. Li Amedê 105 hezar otomobîlên siwaniyê hene, ji van wesaîtan 33 hezar û 708 hezar hebê wê xwedî plakaya 21'ê ne, lê ji 70 hezarî zêdetir plakaya wan a plakayên bajarên din e.
Li gor daneyên Wezareta Maliyeyê di sala 2009'an de li Amedê 41 mîlyon û 625 lîra bac ji erebeyên bi motor hatiye girtin. Li gor vê salê de her wesaît 486 lîra bac tê girtin. Li gor zagonê ji 70 hezar hebî zêdetir erebeyên li Amedê 2 mîlyon lîra bac hatiye girtin lê Amed ji vê yekê mehrûm bûye.
Li ser vê yekê Şaredarê Bajarê Mezin ê Amedê Osman Baydemîr bang li xwediyê erebeyên ku rêya bajarê, kolan, kuçe û parkên bajêr bikar tîne kir û got: "Plakaya 21'ê bikar bînin, baca ku hûn didin bila keda wê ji bo bajêr bê bikaranîn."
Baydemîr bang li amediyan kir û got: "Ger hûn li Amedê dijîn û li vê derê dixebitin plakaya vî bajarî bikar bînin. Ger plakaya we ya bajarekî din be biguherînin." Baydemir got ku plakaya erebeya jina wî jî ya bajarekî din bû lê guhartine. Şaredar Baydemîr got ku baca ku 70 hezar erebe didin diçe bajarekî din.
Osman Baydemir bang li Odeya Ticaretê ya Amedê, Borsaya Ticaretê ya Amedê, Odeya Esnaf û Senatkeran û odeyên bi vî rengî kir û xwest ku di vî warî de pejinkar tevbigerin.
Baydemir diyar kir ku dînamîkên bajêr dikarin di vî warî de kampanyayeke li dar bixin û got ku bi vî awayî dikare hewldana wezaretê ya "Her xwediyê erebeyê erebeya xwe li gor navnîşana kar û kargeha li bajarê lê ye bê tescîlkirin" bikeve jiyanê.
'Ewlehiya jiyana Baydemîr di talûkeyê de ye'
Di vê navberê de Midûriyeta Emniyeta Amedê Şaxa Têkoşîna bi Terorê re teblîgatek ji Baydemîr re şand û diyar kir ku ewlehiya jiyana wî di talûkeyê de ye. Emniyetê got ku daxwaz bike ew dikarin jêre ewlehiyê saz bikin.
Serokê Koma Meclisê ya BDP'ê Nuri Yaman tevî mebûsên xwe çû serdana Baydemîr û got: "Gelek nameyên tehdîdê tên Şaredariya Bajarê Mezin û xebatkarên wê. Ev teblîg dişibe rewşa berî kuştina Hrant Dink."
-