Diyarname
Zarok ji bo hemû dê û bavan muhîm in, lê di her temenî de bi cureyeke din bi pirsgirêkên xwe derdikevin pêşberî dê û bavan. Bi taybetî jî di pêşciwaniya xwe de... Keçika bi navê Ava ku li Tehranê dijî jî bi heman awayî ye. Bi ser de jî barê giran ê rêgezên civakê û dewletê...

Festîvala Fîlmên Serbixwe "İf İstanbul" didome. Di çarçoveya festîvalê de îro fîlmê derhênera îranî Sadaf Foroughi yê bi navê "Ava" derket pêşberî temaşevanan. Fîlm tam jî vê meseleyê, meseleya keçikek diçe lîseyê digire dest. Ava keçika malbatake dewlemend e û li Tehranê diçe lîseyê. Jiyana wê di navbera dibistan, dersên kemanê û mal diçe û tê lê tu zarokek di vê temenê de bi van yekan tenê nasekine. Ava jî bi vî awayî. Lê zordariya malbatê, zordariya midûriya dibistanê û rêgezên dewletê her diçin bi ser Ava de dibin barên giran.
Derhêner ji mînakên jiyana xwe ketiye rê û jê senaryoya vî fîlmî derxistiye holê. Fîlm mijara zarokên di wê temenê de, helwesta dê û bavan baş tîne ziman. Fîlm bi zimanekî dîtbarî mijara xwe xweş dirêse û neynikê datîne ber dê û bavan ku xwe jî di nav pirsgirêkê de bibînin. Hêjaye ku dê û bavên xwedî zarokan li fîlm temaşe bikin,
Fîlmê ku berî niha beşdarî Festîvala Fîlman a Torontoyê jî bûye niha li Stenbolê ye. Di çarçoveya festîvalê de roja 24'ê mehê saet 13'yan de dê li Cinemaximum City's Nîşandaşî (salon 7) careke din bê nîşandayîn.
Çend gotinên li ser derhêner
Derhêner Sadaf Foroughi ku li Tehranê hatiye dinê li Marsîlyayê  di asta mastirê de zanîngeh kuta kiriye. Wê yekem car bi kurtefîlmê xwe "Feminin, Masculin" (9 dq, 2007), gav avêt nav sînemayê. Paşê di sala 2009'an de "The Kid and the Kite" (24 deqe) û di sala 2011'an de jî "La Derniere Scene" kişand. "Ava" yekemîn fîlmê wê yê metrajdirêj e.

KUNYE
Derhêner, senaryo: SADAF FOROUGHI
Derhênera Dîmenê.SINA KERMANIZADEH
Vesazkirin: KIARASH ANVARI
Lîstikvan: MAHOUR JABBARI, BAHAR NOUHIAN, LEILI RASHIDI, VAHID AGHAPOUR, SHAYESTEH SAJADI, HOUMAN HOURSAN, SARAH ALIMORADI

**

Nûçeyên Eleqedar:

- Di 'İf İstanbul'ê de kurtefîlmên ji Tirkiyeyê
- 'IF İstanbul' pêşkêş dike