LERZAN JANDIL
Destcikerdişê seranê 90 de çend roşnavîrê Kurdan, seba ke talîya perwerdeyê domanan û malbatanên kurdan de est a, bikerê pir, amayî têlewe.
Armancê nê roşnavîran ava kerdena ju sazîyêde perwerdeyê domanan û malbatan bî. Çike zafêrîya şarên ke Almanya de cuyena xo ramitêne, wayirê dezgeyanê nîyanênan bîye. Yanê nê şaran heqa ke dewleta Almanya da bî ci ra îstîfade kerdêne. Lê ma xo na heqe ra marum verda bî. Ma hetanî o taw perwerdeyê domanan û malbatanên xo xo rê nêkerd bî derd.
Bi nê têlewe amayişî ma waştêne, ke wa ma kî na heqe ra îstîfade bikerîme, wa şarê ma kî bibo wayirê dezgeyê û nîya kî dest bierzîme perwerdeyê domananên xo .
Lê se ke zanîno, probleman sere de dest kerd ci. Çike zê her tawî, o taw kî seba zaf kesan sîyasetê partîyan, nixteyên cîyayî têlewe amayiş ra, heq û mafanên şarê ma ra muhîmtir bî.
Yanê vindetiş nîya bî. Eke çîyo ke êno kerdene, tenya xizmeta sîyasetê mi, partîya mi keno, rind o. Ez nê karî de est a. Nê eke no çî tenya xizmeta sîyasetê mi, partîya mi nêkeno, rind nîyo û ez nê karî de çîn a.
Jubînî dîyenan û kombîyayişan ra dime humarê nê roşnavîran bî zêde û armanc û polîtîkaya xo kî tayêna bîye zelal û dest bi karê xo kerd.
Gelê kombîyayişan, jubînî dîyenan ra dime sera 1993î de bineyê nameyê Komala malbatanê Kurdistanî bi kilmîye Yekmale fermî amê ava kerdene. Naca de çîyo tewr balkêş o bî, seba ke welatê ma de xêca Kurdan şarê bînî kî est ê, ma nameyê na komele bi zanayiş kerd komela malbatanên Kurdistanî.
Ava kerdena Komele ra dime gere seba komele ju ca bîyamêne dîyene, projektî bîyamêne girewtene. Lê her çiqas ke Almanya de heqa şarê ma kî est bîye, sebebanê polîtîkkîyan ra ma gelê zahmetî, gelê astengî dî.
Hevalanên ke avakerişî de ca girewt bî, no dem de kî, yanê hetanî ke ma ju ca dî, projeyî girewtî, bi zereweşîye zamanê xo, îmkanê xo seba nê karan dayî.
Problemên ke destcikerdiş de est bî, nêqedîyayî hetanî seranê 2000î dewam kerd. Lê pêynîya pêyêne de Yekmale cayê xo girewt û nîşte ro.
Ewro Berlîn de kar û gureyê Yekmale, qedrê yekmalê komelanê derekeyan mîyan de cayêde girs gêno. Yekmale Halêndê domanan “Pîya” ra dime, nêzdîyan de halêndêde bîn kena ra. Kaleka zaf porjektan de projekta “Hetkarîye seba perwerdeyî” karê Yekmale de cayêde girs gêna. Û ewro Kurd, Alman, Tirk, Arab nêzdîyê hîrîs karkerê Yekmale est ê.
Kar û tercubeyanê seran ra dime rojanê 24-26.11.2017 de Yekmale kombîyayişêde hîrêroje kerd amade. Armancê nê kombîyayişî o bî, ke gelo kar û gureyo ke ma hetanî nika kerdo, se derbaz bîyo. Ma mîyanê nê 24 seran de çi rind kerdo? Kêmasîye ma, şaşîyê ma est ê? Gelo ma seba rojan û seranên verê ma programêde senên bivirazîme? Ma se şîkînîme karê xo tayêna rindêrî bikerîme, qadê karê xo bikerîme hîra, tayêna zêdêrî biresîme şarê xo?
Her çiqas ke no kombîyayiş pêynîya hefteyî de û teberê Berlînî de amê viraştene kî, 18 karkeranên Yekmale nê kombîyayişî de ca girewt.
Nê hîrê rojan mîyan de her kesî fikirên xo, waştena xo, problemên xo ardî re zon û nînan ser ro munaqaşayî kerdî. Nê kombîyayişî de karkeranên Yekmale dî, ke Yekmale bi senê zametîyan ama ava kerdene û kamcî merhaleyan ra derbaz bîya. Ked û emegê kamî nê karî de est bî û est o. Naye kî enerjîyo newe, angajmano newe, qedrê kar û gureyê Yekmale tayêna zanayene dê karkeran. Pêynîya kombîyayişî de her kes bi zereweşîye pêyser amê Berlîn û roja bîne dest bi karê xo kerd.
Tawo ke mi dîroka Yekmale avakerdiş ra hetanî nê kombîyayişî rêyêna çimanên xo ver ra derbaz kerde, mi tayêna asan dî, ke Yekmale kotî ra ama kotî.
ljandil@web.de
07.12.2017, Yenî Ozgur Polîtîka