HANA AZAD - HEWLÊR/ROJ NEWS

Serokê Herêma Kurdistanê Mesûd Barzanî û Serokwezîrê Tirkiyê Ahmet Davutoglu piştî hevdîtinê civîneke çapemeniyê lidarxistin. Barzanî di civînê de diyar kir ku wê pêwendiyên xwe yên ligel Tirkiyê zêdetir bikin.

Serokê Herêma Kurdistanê Mesûd Barzanî di civîna çapemeniyê de li ser pêwendiyên Herêma Kurdistanê yên ligel Tirkiyê wiha got: “Em û Tirkiye gelek nêzî hev in û emê pêwendiyên xwe berfirehtir bikin.”

Serokwezîrê Tirkiyê Ahmet Davutoglu sersaxî ji bo qurbaniyên teqîna Hewlêrê xwest û diyar kir ku asayîşa Herêma Kurdistanê ji bo wan girîng e. 

Davutoglu behsa rewşa penaberan kir û diyar kir ku welatê wî amade ye alîkariya mirovî ji bo penaberan bike. Davutoglu destnîşan kir ku di hevdîtina ligel Barzanî de li ser hatina DAIŞ’ê axivîne û ji bo stratejiya xwe rêkbixin. 

Davutoglu di civîna çapemeniyê de ragihand ku ew li ser peymana navbera Hewlêr û Bexdayê de jî axivîne û wiha got: “Tevlîbûna aliyên siyasî di hikumeta nû ya Iraqê de karekî girîng e.”

Serokwezîrê Tirkiyê li ser pirsa ‘Gelo Tirkiye amadeye carekî din hêzên pêşmergeyan li ser xaka wan re derbasî Kobanî bibin?’ wiha got: “Emê di vê rewşa niha de hemû alîkariyekê ligel kurdan bikin. Çûyîna hêzên pêşmergeyan ji bo Kobanî, di encama pêwendiyên baş ên ligel Herêma Kurdistanê de çêbûye.”

Serokê Herêma Kurdistanê Mesûd Barzanî jî li ser peymana navbera Hewlêr û Bexdayê de wiha got: “Peymana ku di navbera Hewlêr û Bexdayê de hatiye îmzekirin despêkek e û piştî şanda kurdî çû Bexda, wê pêngavên cidîtir werin avêtin.”