RÊNAS REMO/ANHA / QAMIŞLO

Hezar û 950 dibistanên Herêma Cizîrê ya Bakurê Sûriyê deriyên xwe ji bo sala nû ya xwendinê vekirin û ev dibistan wê şagirtên astên seretayî, navîn û amadeyî pêşwazî bikin. Di astên seretayî û navîn de materyalên Rêveberiya Xweseriya Demokratîk wê bên xwendin. Her wiha zimanê dayikê yê her gelî bê dayîn.

Desteya Perwerde û Hînkirinê ya Kantona Cizîrê di vê çarçovê de, 16 hezar mamoste perwerde kirin ku dersan bi materyalên nû bi zimanê kurdî, erebî û suryanî bidin.

Betlaneya havînê bi dawî bû. Nêzî 200 hezar şagirtên Cizîrê yên ereb, kurd û suryanî berê xwe dan dibistanan. Komîteya Perwerdeya Civaka Demokratîk sala bihurî materyalên xwendinê guhertin û her gelî bi zimanê dayikê xwendina xwe kir. Ev yek serketî bû, li kêleka zimanê dayikê zimanê îngilîzî û fransî jî wekî dersên zimanê biyanî dihatin dayîn.

Mamosteyên jêhatî û pispor tên amadekirin
Komîteya Perwerdeya Civaka Demokratîk îsal dewreyên havînê ji bo mamosteyan vekirin. Dewre ji bo amadekirina mamosteyan li ser materyalên Rêveberiya Xweseriya Demokratîk bûn ku 3 mehan dewam kirin. Komîteyê her wiha mamosteyên pispor ên zimanên biyanî û pisporên dersên dîrok, erdnîgarî, wêje, werzîş û mûzîkê amade kirin.

Ji bo sala nû ya xwendinê dibistan jî baş hatin amadekirin. Di vê çarçovê de, Rêveberiya Xweseriya Demokratîk 1,5 mîlyar lîre destnîşan kirin da ku pêdiviyên dibistanan bên peydakirin û dibistanên herêmên vê dawiyê hatine rizgarkirin ku çeteyên DAIŞ`ê xirab kiribûn, bên tamîrkirin.

Piştî Projeya Hînkirinê ya sala borî ya asta seretayî serkeftî bû, dê îsal xwendekarên asta navîn materyalên Rêveberiya Xweser bixwînin. Tê payîn sala bê xwendekarên asta amadehî bi materyalên Rêveberiya Xweser, bixwînin.