QAMIŞLO
Desteya Çand û Hunerê ya Kantona Cizîrê ji bo bîranîna şehîd Hisên Şawîş (Herekol) 1′emîn Pêşengeha Pirtûkan a Rojava vekir.
Bi dirûşmeya ″Xwendin asoya mirovan fereh dike″ Desteya Çand û Hunerê ya Kantona Cizîrê ji bo bîranîna şehîd Hisên Şawêş (Herekol) Pêşangeha Pirtûkan vekir. Pêşangeh li Salona Zana ya bajarê Qamişlo vebû.
Gelek nivîskar, rewşenbîr, şervanên YPJ/YPG′ê, Endamên TEV-DEM′ê û nûnerên Desteya Çand û Hunerê ya bajarê Minbicê tevlî pêşengehê bûn.
Di pêşengehê de pirtûkên Desteya Çand û Huner, pirtûkên Akademiya Civaka Demokratîk, Weşanxaneya Şilêr, Weşanxaneya Dara, Weşanxaneya Henai, Yekîtiya Rewşenbîrên Kantona Cizîrê, Yekîtiya Rewşenbîrên Rojavayê Kurdistanê, Yekîtiya Nivîskarên Kurd-Sûrya, Yekîtiya Rewşenbîrên Kantona Kobanî, Yekîtiya Rewşenbîrên Kantona Efrîn, Yekîtiya Nivîskarên Kurdistanê li Sûriyê, Komela Çand a Suryanî, Yekîtiya Nivîskarên Kurdistana Sûrî, HRRK (Hevgirtina Rewşenbîrên Rojavayê Kurdistanê) û gelek kesên nivîskar û rewşenbîrên Rojava beşdar bûn; rojname, kovar û pirtûkên taybet hatin pêkêşkirin.
Di pêşengehê de beşeke taybet ji bo pirtûkên Rêberê PKK'ê Abdullah Ocalan û pirtûkên jinê hat veqetandin Her wiha pirtûkên şehîd Hisên Şawîş, 3 hezar pirtûkên dîrokî û çandî bi zimanên erebî, kurdî, suryanî û tirkî jî di pêşengehê de hene.
Pêşengeh bi deqeyekê rêzgirtine destpê kir. Bi navê Desteya Çandê Aram Elî û bi navê TEV-DEM`ê endamê Desteya Rêveber Aldar Xelîl axivîn.
Di axaftinê de wisa hat gotin: ʺBê pirtûk, bê fikir û bê lêkolîn ne mimkûn e ku em behsa şoreşê bikin an jî bêjin ku em nûneriya şoreşê bikin. Dibe ku şert û mercan li ser me ferz kir ku em girîngiyê bidin parastine, lê belê ev nayê wateya ku em şoreşê bi parastinê sînordar bikin. Rastiya şoreşê di avakirina civak û ferdê rast û rewşenbîr de ye.ʺ
Her wiha dayîka Şehîd Hisên Şawîş Xedîce li ser rêwîtiya şehîd Herekol a şoreşê axivî û got: ʺEz şehadeta wî li Rêber APO û hevalên wî pîroz dikimʺ.
Her wiha di pêşengehê de wêneyên 57 cangoriyên teqîna Qamişlo a 27`ê tîrmehê sala 2016`an ku ji aliyê Samir Kalo ve hatine xêzkirin, hatin pêşkêşkirin.
Dê pêşengeh heyanî 25′ê Tîrmehê bidome û her roj semînerek li ser mijarên "Di navbera jîwar û daxwazê de romana kurdî, çima asta xwendinê kêm e, rola rewşenbîr di şoreşa Rojava de, rewşenbîr û rola bîrawerî yan ramîn û têgihîştinên di xweşbîniya şêwekariyê de werin dayîn."
ANHA