Diyarname
Pêşbaziya Helbestan a Arjen Arî bi merasima xelatdayînê temam bû. Li Amedê, Narîn Yukler ku di pêşbaziyê de bi ser ketibû xelata wê hat dayîn.

Malbata Arî, Weşanên Evrensel û Weşanên Lîsê ev çend sal in ji bo bîranîna helbestvan Arjen Arî "Pêşbaziya Helbestan a Arjen Arî" li dar dixin. Di pêşbaziyê de dosyaya ku bi ser dikeve paşê wekî pirtûk çap dikin. Îsal dosyaya Nalîn Yukler bi ser ket. Ji bo dayîna xelatê îro li Şaxa Yekemîn a Egîtîm-Sena Amedê merasim hat lidarxistin. Axaftina destpêkê ji aliyê nivîskar Îsmaîl Dîndar ve hat kirin. Dîndar got: "Bi OHAL'ê (Rewşa Awarte) re weşanxane, komele, televîzyonên li ser kurdî xebatê dikin hatin girtin. Lê ev yek nikarin pêşî li me bigirin, nikarin ev eşqa ziman a dilê me ji me bigirin."
Di merasimê de helbestan "Şergele" ku Arjen Arî xwendibû wekî sînevîzyonek hat nîşandayîn; xweşka Arê Necla Arî jî axivî û got ku wekî xwendrevanek ew dibêje ku gelek dosyayên baş ji bo pêşbaziyê hatine û xwest weşanxaneyên kurd wan çap bikin.
Hevserokê Komeleya Nivîskarên Kurd Reşo Ronahî li ser navê Nalîn Yukler xelat dana nivîskar Îlhamî Sîdar ku xelatê bigihîne wê.
Juriya Pêşbaziya Arjen Arî ligel Xelata Taybet a Pêşbaziyê li ser navê Akademîsyenên Aştiyê da akademîsyen Esra Mungan. Mungan xelata xwe ji destê Hevserokê PEN'a Kurd Osman Ozçelîk girt.
Mungan di axaftina xwe de wisa got: "Kurdî li vê erdnîganiyê wêje, helbest û muzîkê diafirîne, ev yek gelek bi qîmet e û dê qet winda nebe, berevajî xurtir bibe. Xeyala min ew e, li vê erdnîgariyê çawa yên ku zimanê wan ê zikmakî ne tirkî ye lê Nazim Hîkmet dixwînin û fêm dikin, yên ku zimanê wan ê zikmakî ne kurdî ye helbestên Arjen Arî bi kurdî bixwînin û tehmê jê bigirin. Ji bo vê yekê divê em têbikoşin. Ji ber ev xelat ji vê erdnîgariyê dane Akademîsyenên Aştiyê ez gelek girîng dibînim. Cihek wê yê girîng heye. Ger em dixwazin li vî welatî aştiyê saz bikin bi qasî yên aliyê rojhilatê Firatê, yên li aliyê rojava jî divê dest bidin aştiyê, ev yek berpirsiyariya me ya hemûyan e."
Ozçelîk jî diyar kir ku berdêl çi dibe bila bibe wan aştî qîriyaye, keda vê ji bo pêşketina civakê heye.

Narîn Yukler kî ye?
Helbestvan Narîn Yukler ku bi dosyaya xwe bi ser ket di sala 1988'an de li Wêranşara Rihayê hatiye dinê, li Entabê zanîngeh xwendiye, ji ber rewşa siyasî ji sala 2014'an ve wekî penaber ji mecbûrî li Zaxoyê dijî. Ew zewicandî û diya zarokek e. Yukler ligel kurdî bi tirkî jî dinivîse û par di pêşbaziya "Altin Defne Genç Şiir Odulu" de xelata taybet a juriyê girtibû. Heta niha helbestên wê di gelek weşanan de hatine weşandin. Helbestên wê li flemenî û urducî jî hatine wergerandin û weşandin.
**

Nûçeya eleqedar:

- Di Pêşbaziya Arjen Arî de 'Rê û Rêç' bi ser ket