Diyarname

Kovara Elle bi biryara Serokwezîriya Tirkiyeyê wekî "kovara muzir" hat dîtin û hat xwestin ku li ser berga wê peyva "ji bo zarokan talûke ye" bê nivîsîn.

Kovara "Elle" kovareke li ser moda û jinan e. Yekem car di sala 1945'an de li Fransayê dest bi weşanê kiriye. Li dinyayê bi 43 cureyan derdikeve, mehane 6.6 mîlyon hebû difroşe û 21 mîlyon xwendekarên wê hene.

Li Tirkiyeyê ev kovar yekem car di gulana 1999'an de derket. Kovara ku mehê carek derdikeve ji aliyê koma kovaran a Dogan Burda ve tê derxistin û niha hejmara wê ya adarê jî derket. Lê surprîzek deket holê: Lijneya Parastina Neşriyatên Muzir ji Biçûkan a girêdayî Serokwezîriya Tirkiyeyê biryarek nû derbarê kovarê de da. Biryar roja 24'ê adarê di Rojnameya Fermî de hat weşandin. Li gor Zagona Bi hejmara 1117'an biryar bi yek dengî hatiye girtin û hin foto û nivîsên di kovarê de wekî "îhtîmal e bandorek muzirî pêk bînin" girt. Di biryarê de hat xwestin ku di berga kovarê de "ji bo zarokan bi talûke ye" bê nivîsandin û her wiha kovar bi awayekî vekirî neyê firotin, ji bo firotinê jî reklam neyê kirin.