NAVENDA NÛÇEYAN

Sekreterê berê yê Hizba Demokrata Kurdistanê (HDK) diyar kir ku tu şer û pevçûn di navbera pêşmergeyên wan û gerîllayên HPG'ê de rûnedaye.

Sekreterê berê yê HDKê Ebdullah Hesenzade derbarê îdîaya çapemeniya PDK'ê ku gotibû gerîllayên HPG'ê êrîşî pêşmergeyên HDK'ê kirine ji bo RojNewsê wiha got: “Duh şev tarî bû û li navçeyê bi şaşî gule hatine berdan. Pêşmergeyek birîndar bûye û birîna wî sivik e. Tu pirsgirêk tune ye û rewş aram e.”

Ebdullah Hesenzade di dawiya axaftinên xwe de wiha got: “Nûçeya duh şev hatiye belavkirin ku qaşo şer rûdaye û heta demekê dom kiriye, ji rastiyê dûr e. Tenê çend fîşek hatine berdan.”

Endamê pêwendiyên derve yê KCK'ê Demhat Egîd jî derbarê van îdîayan de ji bo RojNewsê got: “Di navbera gerîla û pêşmergeyan de tu şer û pevçûn rûnedaye. Ragihandinên ku van îdîayan dikin, armanca wan derxistina provakasyonan e. Ev îdîa ji rastiyê dûr in.”

Ji Rojnewsê hatiye girtin