Li Herêma Kurdistanê berdana bi şert a gelek girtiyan ji aliyê rêveberiya herêmî ve hat rawestandin.
Rêveberiya Herêma Kurdistanê berdana gelek rojnameger û aktîvîstên kurd ku cezayên xwe ji sisêyan didoyê wê temam kirine û ji bo wan mafê berdanê heye ku bi şert bên berdan, dane rawestandin.
Hat diyarkirin ku her roja diçe tenduristiya girtiyan xerabtir dibe. 52 rojnameger û aktîvîstên kurd bi îdîaya “ewlehiya neteweyî xistine talûkeyê” girtî ne. Wan di 24’ê tîrmehê de dest bi greva birçîbûnê kiribûn. Ev girtî niha li Girtîgeha Hewlêrê tên ragirtin û girtîgeh ji aliyê Wezareta Karên Civakî û Xebatê ya Hikumeta Herêma Kurdistanê ve tê birêvebirin. Hat ragihandin ku rayedarên girtîgehê mafê hevdîtina parêzeran a bi miwekîlên wan re asteng kiriye.
'BERDANA ME BI MUDAXILEYÊ TÊ ASTENGKIRIN'
Girtiyan ji The New Arab re maneyeke şandine û banga alîkariyê kirine. Gitiyan di nameyê de wisa nivîsiye “Ji bo me li Herêma Kurdistanê azadiya derbirînê, azadiyên sivîlan parast û em li dijî dagirkerî û bombebarana Tirkiyeyê derketin niha em girtî ne û mehkûm in. Ji ber ku dozgeriya giştî ya Herêma Kurdistanê li gorî xala 331’emîn a Qanûna Cezayê yê Iraqê berdana me ya bi şert asteng kir, me dest bi greva birçîbûnê kiriye. Tevî ku me ji sisêyan didoyê cezayê xwe kişandiye jî lê berdana me ya bi şert tê astengkirin û em bi mudaxeleyek partîzanî re rû bi rû ne. Em dixwazin dengê me were bihîstin.”
Di sala 2020'î de li herêma Behdînanê li hemberî hikumeta Herêma Kurdistanê hinek çalakiyên protestoyî hatibûn li dar xistin û wê demê gelek kes hatibûn girtin.
MA