Diyarname

Rojnameger û pêşkêşvan Bedran Dere ku ev 20 sal in di nav karê rojnamegerê, pêre jî di nav karê hunerê de ye ji niha û pêde ji bo Diyarnameyê dê "Pişt Perdeyê" de binivîse. 

Bedran Dere di bihara sala 1972'yan de li navçeya Mûşê Vartoyê ji dayik dibe.

Di sala 1987'an de, di 15 saliya xwe de derdikeve Ewropayê, xwendina xwe li Swissre didomîne.

Di perwerdê de, bala wî diçe ser hunera bedew.  Bi salan resim çêdike, li Swissre û welatên Ewropayê pêşengehên wêneyan vedike.  

Ji ciwaniya xwe ve mêla wî li ser kurdî bû lê bi taybetî, dersên pedagojî, wêje û giramera kurdî ku di sala 1993'yan  li Zanîngeha Zurîchê dest pê kirin, berî wî da nava deryaya akademîk ya kurdî.

Di sala 1994'an de, li Kantona Neuchâtel ya Swîssre cara yekem bi awayeke fermî, dibistana kurdî vedike û ew bi xwe lê mamostetî dike.

Di dawiya sala 1996'an de, li televîzyona kurdî MED TV dest bi karê rojnamegeriyê dike. 

Ew bi tevî hevkara xwe Hêvî Têkosîn, pêşkêşvanê yekem ê Bernameya "Rojbas Kurdistan" e.

Di karê rojnamegeriyê de ew herî zêde wekê pêşkêşvanê nûceyan derket pêş.

Di xebata xwe de, giranî dide ser perwerdeya bikaranîna hunera deng.

Dublaj û xwendina bernameyên dokumanter wekî yek ji karên herî girîng û nazik dibîne.

Xebata wî ya dublaj, nûcevanî û pêşkeşvanîya nûceyan îro di Sterk TV de dewam dike.  

Bedran Dere di Diyarnameyê, di quncikê bi navê "Pişt Perdeyê" de dê giranî bide ser çîrok û nivîsên wêjeyî yên derveyî siyasetê, lê ji ber karê wî û rojnamegeriya wî di navberê re dibe ku carinan bixwaze bala xwendevanan bikişîne ser hin bûyerên siyasî jî.

Em xêrhatinê lê dikin, hêvî dikin dimek dirêj emê bi hev re ji bo kurdî kedê bidin.