Cemal Ozçelîk*
Îro li hemberî Rojava bi koalîsyoneke fireh tevgereke êrîşê hat dest pê kirin.
Emê encam û pêşketinên vê hemû bi hev re bibînin. Lê tam berî êrîşê serdana birêz Mesûd Barzanî a ji bo Enqereyê hin pirs û nîşaneyên wekî "Gelo Barzanî jî di nav vê koalîsyonê de ye?" derketin holê.
Li gor fikra min Başûrê Kurdistanê ne di nav vê kaolîsyona navborî de ye. Lê mesele ev e: Dewleta tirk kengê dest bi êrîşê bike, dibêje hedefa me ne kurd in, bi gotina xwe dibêje 'rêxistina terorê' ye û bi vî awayî îmajek saz dike, hin aliyên kurdan jî digire nava kareyên fotografê. Piştî fotografeke wias jî ji bo raya giştî dibêje, "wekî hûn dibînin tu pirsgrêka me û birayên me yên kurd tune ye."
Serdana Barzanî a tam berî êrîşa li Rojava di vê çarçoveyê de ne tesadufek e. Hem ji bo raya giştî peyamê dide ku "em ligel Barzanî ne" û hem jî li pişt perdeyê hişyarî dide Barzanî, wî manîpule dike û dike ku bêbertek bisekine.
Ji bo vê siyaseta sînsî veşêrin wekî ku li Bakur armanca "çareserî" be îmajên sexte derdixin pêş.
Bi ya min vexwendina Barzanî helbet ne tenê bi Rojava ve bisînor e.
Dewleta tirk ji aliyekê ve li Bakur êrîşên xwe yên dijwar dike, li aliyê din tevgera kurd, ew jî nebe kurdên ji rêzê dixe nava bendewarên vala, dike ku berxwedana wan bişikîne.
Xwezayî ye ku ewê bixwazin di nav vê çarçoweyê de li gorî xwe Barzanî "binirxînin"
Li pişt perdeyê tam çi hatiye axvîn, kîjan fîlm hatine sazkirin em nizanin, lê tu şika me nîn e ku dewleta tirk niyetxirab e.
Mesûd Barzanî xwedî tecrubeye ku dikare siyasetê fêm bike. Ger naxwaze dewleta tirk wî di vîtrînê û ji bo manîpuleyê bikar bîne û ji bo polîtîkayên xwe xerc bike divê hin zêdetir baldar be û neye lîstikê.
24.08.2016
*Têbiniya Diyarnameyê: Cemal Ozçelîk ji Mêrdînê ye, li Zanîngeha Bernê Arkeolojî, Etnolojî û Fîlolojiya Nû ya Rojhilat xwendiye, niha li Bernê dijî, hin pirtûkên wî hatiye weşandin.
Wî ev nivîs di rûpela xwe ya faceyê de belav kiribû, ji ber rojevê û girîngbûna mijarê me wergerand.