Diyarname

ÊVARÊ, AGAHIYÊN NÛ
Li gor rewşa dawî ya vê êvarê hejmara kesên di teqîna çeteyan de şehîd ketine gihîştiye 47'an û 180 jî birîndar hene.
Hevya Sor ragihand ku tirsa wan ew e her ku here hejmara şehîdan û hejmara birîndaran zêde bibe, ji ber ku enkaza avahiyan zê rakirin û pêre jî kesên di binî de mane dibînin.

her wiha hat gotin ku kamyona ku 2 ton bombe lê barkirirî bi mihan hatiye veşartin. Çeteyên DAIŞ'ê wekî ku mihan bînin bajêr komyon bi vî awayî anîne. Ji ber şida bombeyê li Nisêbînê jî camên hin avahiyan şikiyan û 2 kes birîndar bûn.

PIŞTÎ NÎVRO 

Partî û rêxistinên kurd bûyer şermezar kirin

Gelek partî û rêxistinên wekî HDP, DBP, KCD, KNK, TEV-DEM, KCK û bi dehan partî û rêxistinên civakî daxuyanî dan û êrîşa hovane şermezar kirin û eşkere kirin ku dê berxwedana gelên Rojava bi serkeve û hemû êrîşên ku bi piştgiriya hêzên navneteweyî û herêmî pêk tên dê bên têkbirin.

Her wiha Amed Sporê jî di malpera xwe ya fermî de bûyer şermezar kir û ji bo sersaxî xwest. 
Di vê navberê de gel ji bo xwînê bide birîndaran çûn nexweşxaneyan. 
Li her derê kurdan nalek li bûyerê anîn, di twitterê de jî tag ji bo Qamişlo vekirin.

BERÎ NÎVRO 
Teqînek mezin
Vê sibê li Qamişlo komyonek tije bombe li kolana mezin a ji Taxa Xerbî ber bi Hesekê ve diçe hate teqandin. 

Li gor nûçeya ANHA'yê di teqînê de gelek sivîlan jiyana xwe ji dest daye û gelek birîndar bûne. Gelek ambûlans şandin cihê bûyerê.

Li gorî agahiyên ku Cîgirê Desteya Tenduristiyê ya Kantona Cizîrê Silêman Ehmed heta niha 35 kesên ku di nava wan de jin û zarok jî hene jiyana xwe ji dest dane û 150 kes jî birîndar bûn.

Ehmed destnîşan kir ku rewşa hinek birîndaran giran e û tirs heye ku hejmara kesên jiyana xwe ji dest dane zêde bibe.

3 roj şîn hat îlankirin

Koordînasyona Giştî ya hersê Kantonên Rojava (Cizîr, Kobanê û Efrîn), piştî êrîşa li Qamişloyê daxuyanî da û li Rojava 3 roj şîn hat ragihand.

Di daxuyaniya koordînasyonê de hat diyar kirin ku îro li taxa Xerbî ya bajarê Qamişloyê teqînek pêk hat û di encamê de zêdetirî 35 kesî jiyana xwe ji dest dan û bi dehan kes jî birîndar bûn. Her wiha ziyaneke madî ya pir mezin gihişt derûdorê.

Di daxuyaniyê de hat gotin ku ji bo kesên jiyana xwe ji dest dane, li Rojava 3 roj şîn hatiye radigihînin û ji bo sekna li kêleka malbatên qurbaniyan û birîndaran, bang li hemû desteyan hat kirin ku bi hemû rengî destekê bidin. Bi taybetî hat xwestin ku desteya tenduristiyê û desteya şaredariyê di vî alî de peywîra xwe bînin cih.