AMED

Komeleya Nivîskarên Kurd di 3'emîn kongreya xwe de hevserok û rêveberiyek nû hilbijart. Kongreya komeleyê îro saet 13'yan de li Navenda Çand û Hunerê ya Cegerxwînê ya li Kayapinara Amedê lidarket. Bi hilbijartina dîwanê re kongreyê dest pê kir. Hevseroka Komeleyê Netîce Altun ku axaftina destpêkê kir, da zanîn gelê kurd di pêvajoyek zehmet re derbas dibin, divê nivîskarên kurd bi serê xwe nemînin û bibin yek. 
Endamên komeleyê Edîp Berk, Enîse Çagar û Mehmet Çakmak ji bo dîwanê hatin hilbijartin. Çakmak axivî û diyar kir ku pêvajoya ku niha kurd têre derbas dibin, pêwîst dike ku hemû saziyên kurd xwe nû bikin û birêxistin bikin, ji bo wê jî wan kongreya xwe li dar xistiye. Çakmak da zanîn ku mînaka herî mezin ya pêvajoyê ew e ku Licê li ber çavê wan tê şewitandin, ronakbîr û rojmaneger tên girtin, ji bo wê jî divê nivîskarên kurd li hemberî van polîtikayan bibin yek û li ber xwe bidin. 

'Divê nivîskar biqîrin'

Piştî axaftinên destpêkê hin mêvan jî derketin ser dikê û axivîn. Ji wan Hevşaredarê Stewra Mêrdînê M. Aydin Alokman (Feratê Dengizî ku di heman demê de endamê komeleyê ye) axivî û da zanîn ku niha ew di demek wisan re derbas dibin ku divê nivîskar ji bo civaka xwe biqîtin. Alokmen wisa got: "Ev pêvajo ji hemû pêvajoyan awartetir e loma jî roja qîrkirina wijdana nivîskaran e. Divê nivîskar dest ji pirsgirêkên kesî berdin û çîroka qehremanên kurd binivîsin." 

Endama Komeleyê Ayşe Gokan jî wisa got: "Jin hem ji aliyê pergalê û hem jî ji aliyê zihniyeta zilam ve hatine parçekirin. Ji bo vê jî divê cihê jinê hebe, ne tenê pênûs divê hişmendiya jinê bi me re çêbe." 

Piştî mêvanan endamê dîwanê Edîp Berk got ku wan dixwest wekî nîvîskar evînê binivîsin lê jiyanek ew qas bi jehir bi wan didin jiyîn ew neçar in îro Sûr û Cizîrê binivîsin.

Rêveberî nû bû

Piştî axaftinan rapor hatin xwendin, hilbijartin çêbû. Di hilbijartinê de  7 kes ji bo rêveberî û 7 kes jî wekî cîgirên wan hatin hilbijartin. Kesê ji bo rêveberî hatin hilbijartin dûre li nav xwe karbeşî çêkirin û di encamê de Yildiz Çakar û Mehmet Devîren ji bo hevserokatiyê, Hogir Berbir ji bo berpirsiyarê darayî û Eyup Guven jî ji bo sekreteriyê hat hilbijartin. Reşo Ronahî, Roza Metîna û Îlham Bakir jî di nav rêveberî de cih girtin.