ŞIRNEX - DÎHA

Derket holê ku Fermandariya Alaya Bêcuhê bi tangên ku li barafihê bi cih kirine, 40 welatiyên Robozkê bombe kirine û Vedat Encu yê 16 salî qetil kirine. 

Şeva din saet di dor 21.30'an leşkerên Fermandariya Alaya Bêcuhê ya Qilebana Şirnexê welatiyên li ser sînor ên Robozkê bi tang û topên obusê bombe kirin. Di bombebaranê de zarokê 16 salî yê bi navê Vedat Encu qetil kirin û 5 welatî jî birîndar kirin. Herî hindik 40 welatî jî piştî êrîşa tang û topan derbasî milê din ê sînor bûn û agahî ji wan nayê girtin. Derket holê ku koma welatiyên bazirganiya sînor dikin ji aliyê tangên ku li Barageha Leşkerî ya Fermandariya Alaya Bêcuhê ve hatine bombekirin. 

Di êrîşa bombeyî de ji ber ku perçeyê bombeyê li pişta Vedat Encu ket, li cihê bûyerê mir, Welatiyên bi navê Yilmaz, Suvar, Îbrahim û Ozgur Encu jî birîndar bûn. Ji ber bombebarana zêde welatiyên din jî derbasî milê din yê sînor bûn û agahî ji wan nayê girtin. Piştî bûyerê welatiyên gundên Robozkê û Bêcuhê çûn cihê bûyerê. 

Malbata Vedat Encu û birîndarên din çûn cihê bûyerê cenaze û birîndarên xwe wergirtin. Rewşa Yilmaz Encu giran û li Nexweşxaneya Dewletê ya Şirnexê tê dermankirin. 

Cenazeyê Vedat Encu jî li morga nexweşxaneya Şirnexê tê rawestandin. 

Rayedarên leşkerî ji bilî Bavê Vedat Encu Mehmet Encu destûr nadin ku kesekî din wekî refaqatçî têkevin hundir. 

Piştî bûyerê li ber mala malbata Vedat Encu şîn hat danîn. Hat gotin ku piştî otopsiyê dê cenazeyê Vedat Encu bibin li Robozkê defin bikin. Li gor agahiyên hatin dibêjin destûr nadin ku cenazeyê Encu li tenişta yên di komkujiya 2011'an de jiyana xwe ji dest dane defin bikin. Dayika Vedat Encu Hacer Encu êrîşa dewletê şermezar kir.